اسلام آباد (این این آئی)رہنماء پی ٹی آئی اسد قیصر نے کہا ہے کہ ہمارے کارکنان کو اٹھایا جارہاہے، ہمیں اس حد تک نہ لے کر جایا جائے کہ ہمارے پاس کوئی آپشن ہی نہ ہو، ہم پارلیمنٹ کے ساتھ سڑکوں پر بھی مقابلہ کریں گے۔میڈیا سے گفتگو کرتے ہوئے رہنماء پی ٹی آئی اسد قیصر نے کہا ہے کہ رات کو ہمارے رکن اسمبلی معظم جتوئی کو ناجائز طور پر اٹھایا گیا ہے، رکن قومی اسمبلی جمشید دستی کے گھر کا تقدس بھی پامال کیا گیا، ہمارے ایم این اے امیر سلطان کو اٹھایا گیا جو تاحال لاپتہ ہیں، جب پارلیمنٹرینز کے ساتھ یہ رویہ ہے تو عام شہری کے ساتھ کیا ہوگا؟۔

انہوں نے کہا کہ ہمارے ساتھیوں کو فوری رہا کیا جائے، ہمیں دیوار سے لگانا چھوڑ دیں، ہمیں اس حد تک نہ لے کر جایا جائے کہ ہمارے پاس کوئی آپشن ہی نہ ہو۔انہوں نے کہاکہ ہم آئین وقانون کے تحت پارلیمنٹ کے ساتھ سڑکوں پر بھی مقابلہ کریں گے۔