اسلام آباد (این این آئی)وزیر دفاع خواجہ آصف نے 9 مئی اور دفاعی تنصیبات پر حملوں کا ذمہ دار صدر مملکت عارف علوی کو قرار دیدیا۔ میڈیا سے گفتگو میں خواجہ آصف نے کہا کہ 9 مئی حملے اور قومی عمارات اور دفاعی تنصیبات پر حملے کی ابتدا عارف علوی نے کی

سوشل میڈیا پر اخلاقیات کی تباہی بھی عارف علوی نے کی ہے۔خواجہ آصف نے کہاکہ اگر ملکی قانون نے ان سے حساب نہ لیا تو وہ اس جہاں میں نہ سہی اگلے جہاں میں حساب دیں گے، میرا موقف تاریخ کے واقعات کی بنیاد پر ہے۔وزیر دفاع نے کہا کہ عمران خان کی گرفتاری میں فوج کا قطعاً کوئی کردار نہیں تھا، عمران خان کو فوج یا رینجرز نیگرفتار نہیں کیا، رینجرز نے عمران خان کی گرفتاری میں پولیس کی مدد کی، عمران خان فوج پر غلط الزامات لگا رہے ہیں اور اب فوجی تنصیبات پر حملے کی توجیح پیش کر رہے ہیں، عمران خان لوگوں کو اکسانے اور منظم حملوں کے جواز کا بہانہ تلاش کر رہے ہیں۔انہوںنے کہاکہ تحریک انصاف پر پابندی کے حوالے سے ابھی اتحادیوں سے مشاورت اور بحث شروع نہیں ہوئی، تحریک انصاف پرپابندی کی فوری ضرورت پڑی تو اتحادیوں سے مشورہ بھی کرلیا جائیگا۔