اسلام آباد (این این آئی)حکومت نے عام انتخابات کیلئے 15ستمبر جبکہ پی ٹی آئی نے 15اگست کی تاریخ دے دی۔ملک میں ایک ہی دن انتخابات کے حوالے سے حکومت اور پی ٹی آئی کے مابین ہونے والے مذاکرات کا تیسرا اور فائنل راؤنڈ گزشتہ روز ہوا جس کی اندورنی کہانی سامنے آگئی ہے۔
ذرائع کے مطابق مذاکرات سے قبل فریقین نے اپنے قائدین سے تفصیلی مشاورت کی، (ن) لیگ کے ارکان نے نواز شریف سے بھی مشاورت کی جبکہ پی ٹی آئی کا وفد عمران خان سے مشاورت کے بعد مذاکرات میں شریک ہوا۔ذرائع کے مطابق مذاکرات میں حکومت نے عام انتخابات کیلئے 15ستمبر جبکہ پی ٹی آئی نے 15اگست کی تاریخ دی ہے۔نجی ٹی وی کے مطابق پی ٹی آئی نے 14مئی سے قبل اسمبلیوں کی تحلیل کی تجویز دی ہے، جبکہ حکومتی اتحاد نے 15جولائی کو اسمبلیاں تحلیل کرنے کا کہا ہے۔
دونوں فریقین نے اپنی تجاویز ایک دوسرے کے سامنے رکھنے کے بعد اپنے اپنے قائدین سے مشاورت کا وقت مانگا ہے۔ 2روز تک فریقین مشاورت مکمل کرکے دوبارہ رابطہ کریں گے۔ فریقین نے مذاکراتی عمل پر بیان بازی روکنے پر بھی اتفاق کیا ہے۔حکومتی اتحاد کا کہنا ہے کہ معاشی صورتحال ابتر ہوئی تو الزام حکومت پر آئیگا، حکومتی اتحادی نے عمران خان کے یوٹرن کے خدشات پر اظہار تشویش کیا۔
