کراچی(این این آئی) کرونا وائرس بے قابو،سندھ میں کورونا وائرس متاثرین کی تعداد 150سے تجاور کرگئی ہے ، جس کے بعد ملک بھر میں وائرس سے متاثر افراد کی تعداد 189 تک پہنچ گئی ہے۔تفصیلات کے مطابق دنیا بھر میں تباہی مچانے والاکرونا وائرس پاکستان میں بھی بے قابو ہونے لگا ہے۔
وائرس سے متاثرہ افراد کی تعداد 189تک پہنچ گئی ہے۔گزشتہ روز صوبہ سندھ میں مزید کیسز رپورٹ ہونے کے بعد تعداد میں بہت تیزی کے ساتھ اضافہ ہوا، صوبے میں ٹوٹل کیسز 155تک پہنچ چکے ہیں۔ترجمان حکومت سندھ بیرسٹر مرتضی وہاب کے مطابق صوبے میں کورونا وائرس کے مزید 5 افراد سامنے آئے ہیں جس کے بعد سندھ میں کورونا وائرس کے متاثرین کی تعداد 155 ہوگئی ہے جب کہ سکھر میں موجود 234 زائرین کے کورونا وائرس ٹیسٹ مکمل کرلیے گئے جس میں سے 119 زائرین کے ٹیسٹ مثبت اور 115 کے منفی ہیں۔محکمہ صحت سندھ کا کہنا ہے کہ پانچوں متاثرہ افراد نے سعودیہ کا سفر کیا تھا جب کہ 119 مریض سکھر کے آئسولیشن وارڈ میں زیر علاج ہیں، کراچی سے اب تک 35 کورونا وائرس کے مریض سامنے آچکے ہیں، ایک مریض کا تعلق حیدرآباد سے ہے، سندھ میں 153 مریض زیرِعلاج جب کہ 2 کو ڈسچارج کیاجاچکا ہے۔دریں اثنا کروناوائرس،حکومت سندھ کی ہدایت پر پولیس نے سخت اقدامات کرنے شروع کردیئے ہیں،مختلف کاررائیوں کے دوران10افراد کو گرفتار کرلیاہے ۔تفصیلات کے مطابق کراچی میں شاہراہ فیصل پر عوامی مرکز کے قریب ریسٹورنٹ میں پابندی کے باوجود شادی کی تقریب کا اہتمام کرنے پر پولیس نے چھاپا مارکر منیجر سمیت 3افراد کو گرفتار کرلیا۔
ادھر کھارادر میں ذخیرہ اندوزوں کے خلاف کارروائی میں 6 افراد کو گرفتار کرکے ماسک اور سینی ٹائزر کے کئی کارٹن برآمد کرلیے۔ گرفتار افراد کے خلاف مقدمہ درج کرلیا گیاہے۔علاوہ ازیں پولیس نے ڈیفنس سے جعلی ڈاکٹر کو گرفتار کرلیا۔ ملزم کورونا وائرس سے بچائوکا کہہ کر ویکسین فروخت کررہا تھا۔دوسری جانب پولیس نے سپر ہائی وے پر تمام ہوٹل بند کرادیئے ہیں، سپرہائی وے پر100 سے زائد بڑے اور 200 کے قریب چھوٹے ہوٹلز ہیں۔
