راولپنڈی (این این آئی)پاک فوج کے سربراہ جنرل قمر جاوید باجوہ نے واضح کیا ہے کہ مسلح افواج کسی بھی محاذ پر ہر قسم کی دھمکیوں کو شکست دینے کی بھرپور صلاحیت رکھتے ہیں۔ہفتہ کو آئی ایس پی آر کے مطابق آرمی چیف جنرل قمر جاوید باجوہ نے لائن آف کنٹرول پر نادرن لائٹ انفنٹری کا دورہ کیا،آرمی چیف نے آپریشنل تیاریوں اور جوانوں کے بلند حوصلے و جذبات کو سراہا۔آرمی چیف نے پاکستانی فورسزکی جانب سے بھارتی فوجیوں
کی بلااشتعال فائرنگ کا موثر جواب دینے کو سراہا۔اس موقع پر آرمی چیف نے کہا کہ پاکستانی فورسز لائن آف کنٹرول کے اس پار عام کشمیریوں کی سلامتی اور سیکیورٹی کی وجہ سے فائرنگ سے گریز کرتی ہے۔انہوں نے کہا کہ ہم ملک کو درپیش سیکیورٹی اور دفاعی چیلنجز سے بخوبی آگاہ ہیں اور ہم ہر قسم کی دھمکیوں کو شکست دینے کی صلاحیت رکھتے ہیں۔اس موقع پر کور کمانڈر راولپنڈی بھی آرمی چیف کے ہمراہ تھے۔
