اسلام آباد (این این آئی) وزیر اعظم عمران خان نے کہا ہے کہ کرپشن کا خاتمہ حکومت کی اولین ترجیح ہے ، کرپشن کے خاتمے اور بدعنوان عناصر کے خلاف بلاتفریق و امتیاز کاروائی کو ایک مشن سمجھ کر پورا کیا جائے، حکومت اس ضمن میں ہر ممکنہ تعاون فراہم کریگی۔ہفتہ کو وزیر اعظم عمران خان سے ڈائریکٹر جنرل اینٹی کرپشن اعجاز حسین شاہ نے ملاقات کی۔ اس موقع پر وزیر اعلی پنجاب سردار عثمان بزدار بھی موجود تھے۔ وزیراعظم نے کہا کہ
کرپشن کا خاتمہ حکومت کی اولین ترجیح ہے۔ انہوں نے کہا کہ کرپشن کے ناسور نے نہ صرف ملکی معیشت کو ناقابل تلافی نقصان پہنچایا ہے بلکہ اداروں کو تباہ کیا ہے اور عام آدمی کی زندگی کو متاثر کیا ہے۔انہوں نے کہا کہ کرپشن اور ترقی کا سفر ایک ساتھ نہیں چل سکتا۔ وزیر اعظم نے کہا کہ کرپشن کے خاتمے اور بدعنوان عناصر کے خلاف بلاتفریق و امتیاز کاروائی کو ایک مشن سمجھ کر پورا کیا جائے، حکومت اس ضمن میں ہر ممکنہ تعاون فراہم کریگی۔
