اسلام آباد ( آ ن لائن) قومی اسمبلی اجلاس میں وفاقی وزراء کی عدم موجودگی پر اپوزیشن کے احتجاج کے بعد سپیکر نے اجلاس معطل کر کے وزراء کی موجودگی کو یقینی بنانے کی ہدایت کر دی ،پیپلز پارٹی کے رکن قومی اسمبلی خورشید شاہ نے اجلاس شروع ہوتے ہی مسلسل تاخیر کا ذمہ دار سپیکر قومی اسمبلی کو قرار دیتے ہوئے بروقت اجلاس شروع کرنے کی درخواست کی ۔

جمعرات کے روز قومی اسمبلی کے اجلاس وقفہ سوالات کے دوران وزارت خزانہ سے متعلق سوالات کا جواب دینے کے لئے وزیر اعظم کے مشیر برائے خزانہ سمیت وزیر مملکت برائے خزانہ اور پارلیمانی سیکرٹری خزانہ کی عدم موجودگی پر اپوزیشن اراکین نے احتجاج کیا ۔اس موقع پر پیپلز پارٹی کے سید نوید قمر اور مسلم لیگ (ن) کے شیخ روحیل اصغر نے کہا ہے کہ خزانہ سے متعلق اہم سوالات کے موقع پر وزراء کی عدم موجودگی افسوناک ہے اس موقع پر خورشید شاہ نے نکتہ اعتراض پر بات کرتے ہوئے کہا کہ قومی اسمبلی کا اجلاس مسلسل تاخیر سے شروع ہونے کی ذمہ دار سپیکر قومی اسمبلی ہے ،بزنس ایڈوائزری کمیٹی کے اجلاس میں فیصلہ کیا گیا تھا کہ اگر ایوان میں صرف ایک رکن بھی موجود ہوتو پھر بھی اجلاس بروقت شروع کیا جائے گا اور کورم کی نشاندہی نہیں کی جائے گی تاہم حکومت کی جانب سے اجلاس شروع ہونے میں مسلسل تاخیر کی جارہی ہے ،انہوں نے سپیکر قومی اسمبلی سے درخواست کی کہ وہ بروقت تشریف لا کر اجلاس شروع کریں۔بعد ازاں سپیکر نے اپوزیشن کے احتجاج پر ایوان کی کارروائی معطل کرتے ہوئے وزیر مملکت برائے پارلیمانی امور علی محمد خان کو وزارت خزانہ سے متعلق سوالات کا جواب دینے کے لئے وزیر یا پارلیمانی سیکرٹری کی حاضری کو یقینی بنانے کی ہدایت کی ۔

موضوعات:قومی اسمبلی