اسلام آباد (مانیٹرنگ ڈیسک)چوہدری نثار نے انہیں وزیر اعلیٰ پنجاب بنائے جانے کے بارے میں کہا ہے کہ جنہوں نے شوشہ چھوڑا ہے وہی لوگ اس کا جواب بھی دیں۔ انہوں نے پیشگوئی کی کہ رواں سال کے آخر میں مہنگائی عوام کی چیخیں نکلوا دے گی ۔ صحافیوں سے غیر رسمی گفتگو کرتے ہوئے سابق وزیر داخلہ نے کہا کہ وہ سیاست عہدے کیلئے نہیں عوام کیلئے کرتے ہیں، چوہدری نثار نے کہا کہ اگر وہ عمران خان کے ساتھ ہوتے
تو کہتے کہ ایک جگہ اکٹھے ہوجائیں کیونکہ آج اتحاد کی ضرورت ہے۔انہوں نے واضح کیا کہ ان کا مستقبل قریب میں بطور رکن پنجاب اسمبلی حلف اٹھانے کا کوئی ارادہ نہیں ہے ۔میں نے اس لیے پنجاب اسمبلی کا حلف نہیں اٹھایا کیونکہ میرے ساتھ قومی اسمبلی کی نشست پر ہاتھ ہوا۔یاد رہے کہ پچھلے دنوں یہ اطلاعات سامنے آئی تھیں کہ چوہدری نثار جلد پنجاب اسمبلی کے ممبر کا حلف اٹھائیں گے اور ممکنہ طور پر پنجاب کے نئے وزیر اعلیٰ ہونگے۔
