اسلام آباد(مانیٹرنگ ڈیسک) پسند کی شادی کرنے والے نوجوان کے بوڑھے والد سے لڑکی کے خاندان والوں کا انتہائی شرمناک سلوک،60سالہ بوڑھے والد کی داڑھی مونچھیں اور بھنویں مونڈ کر بہیمانہ تشدد کے بعد گلے میں پٹہ ڈال کر گاؤں کے چوک میں بجلی کے پول سے باندھنے کے بعد منہ میں نالی کا پانی ڈال کر منہ پر غلیظ کیچڑ ملتے رہے،روزنامہ نوائے وقت کے مطابق پنجاب کے شہر بورے والا کے نواحی گائوں 146ای بی میں محمد اکرم آرائیں
کے بیٹے محمد وسیم نے کچھ عرصہ قبل اسی گائوں کے خادم حسین گجر کی بیٹی سے پسند کی شادی کی تھی جس کا لڑکی کے گھر والوں کو شدید رنج تھا۔ گائوں میں ہونے والی پنچایت کے ذریعہ لڑکی کو واپس کر دیا گیا اور بوڑھے باپ نے اپنے بیٹے کو عاق بھی کر دیا تھا اس کے باوجود ورثاء کے انتقام کی آگ ٹھنڈی نہ ہوئی گذشتہ روز ملزمان سبحانی گجر،نعیم،جمال اور بلا سبحانی وغیر وسیم کے بوڑھے والد محمد اکرم ارائیں کو گھر سے نکلتے ہی قابو کر کے اس کی داڑھی مونچھیں اور بھنویں مونڈ کر تشدد کرتے ہوئے چوک میں لے آئے جہاں پول سے باندھ کر دوران تشدد اس کے منہ میں نالی کا گندہ پانی ڈالتے ہوئے کیچڑ بھی اس کے منہ پر ملتے رہے بوڑھا شخص گڑ گڑا کر جان بخشی کے واسطے دیتا رہا مگر کسی نے ایک نہ سنی بلکہ گائوں والے بھی بااثر ملزمان کے خوف سے اس کی مدد کو نہ آئے مضروب کو شدید زخمی حالت میں تحصیل ہیڈ کوارٹر ہسپتال بورے والا داخل کروا دیا گیا ذرائع کے مطابق وسیم نے دسمبر2017کو پسند کی شادی کی تھی اور جنوری 2018میں معززین علاقہ کے کہنے پر طلاق دیدی تھی اور لڑکی والدین کے حوالے کر دی گئی تھی باپ نے اس اقدام پر اپنے بیٹے وسیم کو عاق کر کے لاتعلقی کا اعلان کر دیا تھا اس کے باوجود بااثر چوہدری کی جانب اسے سنگین نتائج کی دھمکیاں دینے کا سلسلہ جاری تھا۔
