اسلام آباد (این این آئی)دفتر خارجہ کے ترجمان نفیس زکریانے کہا ہے کہ سربراہ پاک فوج جنرل قمر جاوید باجوہ اکتوبر کے شروع میں روس کا دورہ کریں گے اور یہ دورہ پاک روس باہمی تعاون مزید بہتر بنانے کی خواہش کا مظہر ہے۔انہوں نے آرمی چیف کے دورہ روس کو پاکستان اور روس کے درمیان اعلیٰ سطح کے رابطوں کا تسلسل بھی قرار دیا ہے ۔
ایک سوال پر انہوں نے کہاکہ پاکستانی وزارت دفاع اور داخلہ نے ڈرون حملے کی تصدیق نہیں کی اور جب تک کوئی تصدیق نہیں ہوجاتی وزارت خارجہ کسی واقعے کی مذمت نہیں کرتا۔ پاکستانی دفتر خارجہ نفیس زکریا نے کہا ہے کہ بھارت دوسرے ممالک کے ذریعے پاکستان میں دہشت گردی پھیلا رہا ہے اور بھارت کی جانب سے افغان سرزمین کے استعمال کے ناقابل تردید ثبوت بھی موجود ہیں ٗجاپان بھارت اعلامیے میں پاکستان سے متعلق غیرضروری حوالے تھے ٗ وزیراعظم کی نیویارک میں متعدد ممالک کے سربراہان سے ملاقاتیں مثبت رہیں ٗپاک بھارت وزرائے اعظم کی ملاقات شیڈول نہیں ٗ جمعرات کو ترجمان دفترخارجہ نفیس زکریا نے ہفتہ وار پریس بریفنگ میں کہاکہ بھارت پاکستان اور بالخصوص بلوچستان میں تخریب کاری میں ملوث ہے اور کلبھوشن جیسے ایجنٹوں کے ذریعے دہشت گردی کرائی جاتی ہے۔انہوں نے کہا کہ بھارتی وزیراعظم کے بلوچستان سے متعلق بیان کے بعد سے پاکستان مخالف مہمات میں تیزی آگئی ہے جبکہ جنیوا میں پاکستان مخالف مہم میں ملوث بلوچستان ہاؤس تنظیم کو بھارت نے فنڈنگ کی۔نفیس زکریا نے کہاکہ بھارت خود اپنے ملک میں حملہ کراتا ہے اور مسلمان شہریوں پر الزام تراشی کرتا ہے۔ ترجمان نے کہاکہ بھارت مقبوضہ میں کشمیر میں دہشت گردی میں ملوث ہے اور اپنے ہمسایوں میں بھی ریاستی دہشت گردی کررہا ہے گزشتہ چند برسوں میں پاکستان مخالف مہمات جاری ہیں اور بھارت ان میں براہ راست ملوث رہا ہے،
تحریک طالبان کے ترجمان احسان اللہ احسان کے بیانات ہمارے مؤقف کی تائید ہیں۔جاپانی وزیراعظم کے دورہ بھارت اور مشترکہ اعلامیے پر ردعمل دیتے ہوئے ترجمان دفتر خارجہ نے کہاکہ جاپان بھارت اعلامیے میں پاکستان سے متعلق غیرضروری حوالے تھے۔ترجمان نے کہا کہ جاپانی وزیراعظم نے پاکستان کے بارے میں غیرضروری ریمارکس دئیے ٗ جاپان کو بھارت کی جانب سے دہشت گردی بطور ریاستی ہتھیار استعمال کرنے سے آگاہ ہونا چاہیے۔
سابق وفاقی وزیر داخلہ چوہدری نثار علی خان کی جانب سے برکس اعلامیے پر دفتر خارجہ کو تنقید کا نشانہ بنائے جانے پر ترجمان دفتر خارجہ نے تبصرے سے گریز کیا۔نفیس زکریا نے کہا کہ وزیراعظم کی نیویارک میں متعدد ممالک کے سربراہان سے ملاقاتیں مثبت رہیں تاہم اقوام متحدہ کی جنرل اسمبلی کے موقع پر پاک بھارت وزرائے اعظم کی ملاقات شیڈول نہیں ہے۔
