اسلام آباد (مانیٹرنگ ڈیسک) کابینہ کا اجلاس، اہم ترین لیگی رہنما روتے رہے، وہ کون تھے اور وجہ کیا بنی؟ تفصیلات کے مطابق کابینہ کے اجلاس میں جب حکومت کے خلاف سازشوں کا ذکر کرتے ہوئے سردار مہتاب کی آنکھوں میں آنسو آ گئے تو ماحول رنجیدہ ہوگیا، ایک اخبار کی رپورٹ کے مطابق کابینہ کے اجلاس میں چوہدری نثار، خواجہ سعد رفیق، اکرم درانی، حاصل بزنجو، وزیراعظم کے مشیر عرفان صدیقی اور سردار مہتاب نے اپنے خیالات کا اظہار کیا۔
تمام شرکاء نے ہی جذباتی تقریریں کیں مگر سب سے زیادہ جذباتی تقریر سردار مہتاب کی تھی، سردار مہتاب نے اپنے خیالات کا اظہار کرتے ہوئے کہا کہ جناب وزیر اعظم! یہ سازش حکومت کے نہیں ہماری آنے والی نسلوں اور ملک کے خلاف ہو رہی ہے، کیا ہم یہ سب کچھ ہوتا دیکھتے رہیں اور خاموش رہیں، ہم اس سازش کے خلاف چپ نہیں رہیں گے، یہ ملک کے مستقبل کا معاملہ ہے، سردار مہتاب نے کہا کہ جے آئی ٹی رپورٹ تیسری مرتبہ منتخب وزیراعظم کو بدنام کرنے کی سعی ہے، اس کے خلاف مزاحمت نہ کی تو قوم ہمیں قصوروار ٹھہرائے گی، مسلم لیگ (ن) کی قیادت کو کرپٹ ثابت کرنے کے لیے یہ ڈرامہ رچایا گیا، سردار مہتاب کے جذباتی خطاب پر کابینہ ارکان رنجیدہ ہوگئے۔ بہت سے وزراء اپنے خیالات کا اظہار کرنا چاہتے تھے مگر وقت کی کمی آڑے آئے اور وہ خطاب نہیں کرسکے، خاص طور پر اتحادی جماعتوں کے وزراء کو بولنے کا موقع دیا گیا، اتحادی جماعتوں سے تعلق رکھنے والے میرحاصل بزنجو اور اکرم درانی نے وزیراعظم اور ان کے خاندان کے دفاع کا اعلان کیا، وزیراعظم کے مشیر عرفان صدیقی نے کہا کہ وزیراعظم صاحب آپ پر کرپشن، بدعنوانی کا کوئی الزام نہیں، آپ کیوں کہ حق پر ہیں اور قانونی جنگ لڑنا آپ کا حق ہے، اور ہمیں بھی آپ کی حمایت کرنے میں کوئی عار محسوس نہیں ہو رہی۔
