اسلام آباد (مانیٹرنگ ڈیسک) خیبرپختونخوا اور سندھ حکومت کا خاتمہ، قومی اسمبلی کے ارکان کی بڑی تعداد نے استعفے دینے کا فیصلہ کر لیا، تفصیلات کے مطابق نجی ٹی وی چینل کے ایک پروگرام میں گفتگو کرتے ہوئے سینئر صحافی چوہدری غلام حسین نے کہا کہ وزیراعظم نواز شریف کو اپوزیشن جماعتوں الٹی میٹم دینے کا فیصلہ کر لیا ہے، انہوں نے مزید کہا کہ تمام اپوزیشن جماعتیں چاہتی ہیں کہ وزیراعظم اب مستعفی ہو جائیں،
اپوزیشن جماعتوں کے مطابق وزیراعظم نواز شریف غیر قانونی طور پر وزیراعظم ہاؤس میں رہ رہے ہیں۔ سینئر صحافی نے مزید کہا کہ اگر وزیراعظم مستعفی نہ ہوئے تو اپوزیشن جماعتیں وزیراعظم ہاؤس کا گھیراؤ کر لیں گی، انہوں نے کہا کہ سپریم کورٹ کے دو جج نواز شریف کو پہلے ہی جھوٹا قرار دے چکے ہیں، باقی تین ججز نے اپنے فیصلہ میں کہا کہ تھا کہ مشترکہ تحقیقاتی ٹیم کی رپورٹ پر فیصلہ دیں گے۔ سینئر صحافی چوہدری غلام حسین نے کہا کہ اگر پھر بھی مسلم لیگ (ن) والے باز نہ آئے اور ہٹ دھرمی جاری رکھی تو اپوزیشن خیبر پختونخوا حکومت، سندھ حکومت اسمبلیاں توڑ دے گی اور قومی اسمبلی کے تقریباً 85 ایم این ایز بھی استعفیٰ دے دیں گے۔ اپوزیشن جماعتوں تحریک انصاف، جماعت اسلامی، پیپلز پارٹی، مسلم لیگ (ق)، ایم کیو ایم اور پاک سرزمین پارٹی کا کہنا ہے کہ ایک کرپٹ وزیراعظم ملک نہیں چلا سکتا، اپوزیشن کا کہنا تھا کہ اگر وزیراعظم اپنی کرسی نہیں چھوڑتے تو ہم اسمبلیاں چھوڑ کر باہر بیٹھنے پر مجبور ہو جائیں گے۔
