پشاور(آن لائن) وفاق کے زیر انتظام قبائلی علاقے فاٹا کی خیبر ایجنسی میں خودکش حملہ آوروں کی فرنٹیئر کانسٹیبلری (ایف سی) کے کیمپ میں داخلے کی کوشش ناکام بنادی گئی۔سیکیورٹی ذرائع کے مطابق خیبرایجنسی کی تحصیل لنڈی کوتل کے علاقے جڑوبی میں ایف سی کیمپ میں 2 دہشت گردوں نے داخل ہونے کی کوشش کی جس پر ایف سی نے بروقت کارروائی کرتے ہوئے ایک خودکش حملہ آور کو ہلاک کردیا

دوسرے دہشت گرد نے خود کو گیٹ پر ہی دھماکے سے اڑالیا۔سیکیورٹی ذرائع کے مطابق واقعے میں 2 ایف سی اہلکار بھی زخمی ہوئے جنہیں کمبائنڈ ملٹری ہسپتال (سی ایم ایچ) منتقل کردیا گیا۔واقعے کے بعد سیکورٹی فورسز نے علاقے کو گھیرے میں لیتے ہوئے سرچ آپریشن شروع کردیا۔یاد رہے کہ رواں ماہ یکم جولائی کو بھی خیبر ایجنسی میں نصب بارودی مواد کے دھماکے میں ایک سیکیورٹی اہلکار سمیت 4 افراد جاں بحق ہوگئے تھے۔خیبر ایجنسی افغان سرحد کے ساتھ پاکستان کے قبائلی علاقے میں وفاق کے زیر انتظام علاقوں میں سے ایک ہے.پاک افغان سرحد پر ان قبائلی علاقوں میں فوج متعدد آپریشنز کر چکی ہے جس کے بعد یہاں سیکیورٹی صورتحال بہتر کرنے کا دعویٰ کیا جاتا ہے۔خیبر ایجنسی میں گذشتہ 2 برس میں 2 آپریشن خیبر۔ون اور خیبر۔ٹو کیے گئے جبکہ شمالی وزیرستان میں بھی جون 2014 میں آپریشن ضرب عضب کا آغاز کیا گیا تھا۔