اسلام آباد (این این آئی) وزیراعظم محمد نواز شریف نے کہا ہے کہ اللہ تعالی کے فضل وکرم سے میرے ضمیر پر کوئی بوجھ نہیں ہے، کیا جمہوریت فروش سازشی ٹولے کے کہنے پر استعفیٰ دے دوں؟،ہمارے خاندان نے سیاست سے کمایا کچھ نہیں البتہ کھویا بہت کچھ ہے،ملک میں اربوں کے منصوبے لگ رہے ہیں کسی میں بد عنوانی نہیں ہوئی ، ہم نے چار سال میں تعمیر وترقی کا اتنا کام کیا جتنا دو دہائیوں میں نہیں ہوا،

پھر سے اندھیروں کو اپنی بستیوں ، کارخانوں کا رخ نہیں کرنے دیں گے۔ جمعرات کو وفاقی کابینہ کے اجلاس سے خطاب کرتے ہوئے وزیراعظم محمد نواز شریف نے کہا کہ جے آئی ٹی کی رپورٹ ہمارے ذاتی کاروبار کے بارے میں مفروضوں، الزامات اور بہتانوں کا مجموعہ ہے، ہمارے خاندان نے سیاست سے کمایا کچھ نہیں البتہ کھویا بہت کچھ ہے،انہوں نے کہا کہ میں نے استعفے کا مطالبے کرنیوالوں کے مجموعی ووٹوں سے زیادہ وٹ لئے ہیں، انہوں نے کہا کہ اللہ کے فضل وکرم سے میرے ضمیر پر کوئی بوجھ نہیں ہے کہ جمہوریت فروش سازشی ٹولے کے کہنے پر استعفیٰ دے دوں؟۔انہوں نے کہا کہ ملک میں اربوں کے منصوبے لگ رہے ہیں لیکن کسی میں بد عنوانی نہیں ہوئی ، ہم نے چار سال میں تعمیر وترقی کا اتنا کام کیا جتنا دو دہائیوں میں نہیں ہوا۔ انہوں نے کہا کہ پھر سے اندھیروں کو اپنی بستیوں ، اپنے کارخانوں کا رخ نہیں کرنے دیں گے انہوں نے کہا کہ 1985ء سے لیکر آج تک 32سالوں کے دوران ایک پیسے کی خورد برد بھی کی توبتائی جائے ، مخالفین تو یہ الزام تک بھی نہیں لاسکے ، انہوں نے کہا کہ وقت آنے پر سب راز کھل جائیں گے اور وہ وقت زیادہ دور نہیں ہے۔انہوں نے کہا کہ تعمیر وترقی کے سفر کو ڈی ریل نہیں ہونے دیں گے۔ پاکستان ماضی میں ان تماشوں کی بہت بھاری قیمت ادا کرچکا ہے۔ اب یہ سلسلہ بند ہوجانا چاہئے۔کابینہ کے ارکان نے وزیراعظم کے مستعفی نہ ہونے کے دوٹوک اعلان کا زبردست خیر مقدم کرتے ہوئے ڈیسک بجا کر فیصلے کی توثیق کی۔ ‎