کراچی (آئی این پی)وزیراعظم کے مشیر برائے خارجہ امورسرتاج عزیزنے کہا ہے کہ بحر ہند کا خطہ سیاسی اور معاشی لحاظ سے انتہائی اہمیت اختیار کر گیا ہے‘ پاکستان کشیدگی سے پاک بحرہند چاہتا ہے ‘ علاقے میں اقتصادی ترقی کے وسیع مواقع موجود ہیں ‘ اقتصادی راہداری کی اہمیت میں روزبروز اضافہ ہو رہا ہے‘ کشیدگی اور تنازعات کے باعث خطے کے وسائل سے استفادہ نہیں کیا جا سکتا‘ میری ٹائم سیکیورٹی کیلئے مشترکہ پٹرولنگ کی ضرورت ہے‘میری ٹائم سیکیورٹی چیلنجز سے نمٹنے کیلئے تیار ہے ۔
ہفتہ کو ساتویں بین الاقوامی 3 روزہ میری ٹائم کانفرنس کے افتتاحی سیشن سے خطاب کرتے ہوئے مشیر خارجہ سرتاج عزیز نے کہا کہ امن 2017ء مشقیں امن و استحکام کیلئے ملکوں کے تعاون کی عکاس ہیں۔ بحر ہند مشق وسطیٰ ‘ جنوبی ایشیاء اور افریقہ کے درمیان رابطے کا ذریعہ ہے۔ بحر ہند کا ساحل 30 ممالک سے ملتا ہے۔ دنیا میں تیل و گیس کے 30 فیصد ذخائر اس خطے میں موجود ہیں۔ عالمی تجارت کا بڑا حصہ بحر ہند کے سمندری راستوں سے ہوتا ہے۔ انہوں نے کہاکہ اقتصادی راہداری کی اہمیت میں روزبر وز اضافہ ہو رہا ہے۔ بحر ہند کا خطہ سیاسی اور معاشی لحاظ سے انتہائی اہمیت اختیار کر گیا ہے۔ پاکستان کا 1000 کلو میٹر سے زائد کا ساحلی علاقہ معاشی لحاظ سے اہم ہے۔ پاکستان کشیدگی سے پاک بحر ہند چاہتا ہے۔ سرتاج عزیز نے کہاکہ پاکستان کی تجارت کا بڑا حصہ بحر ہند سے جاتا ہے۔ علاقے میں اقتصادی ترقی کے وسیع مواقع موجود ہیں۔ میری ٹائم سیکیورٹی چیلنجز سے نمٹنے کیلئے تیار ہیں ۔قزاقی سے نمٹنے کیلئے پاکستان دوسرے ممالک کے ساتھ مل کر کام کر رہا ہے۔ میری ٹائم سیکیورٹی کا مطلب بندرگاہوں اور بحری راستوں کا تحفظ ہے۔ انہوں نے کہا کہ رسد کی ترسیل کیلئے محفوظ بحر ہند ضروری ہے۔ خطہ وسائل سے مالا مال ہے۔ وسائل سے استفادہ کیلئے بحر ہند کا کلیدی کردار ہے۔ میری ٹائم سیکیورٹی کیلئے مشترکہ پٹرولنگ کی ضرورت ہے۔ کشیدگی اور تنازعات کے باعث خطے کے وسائل سے استفادہ نہیں کیا جا سکتا۔
