نئی دہلی(آئی این پی)بھارتی میڈیا نے پاک چین اقتصادی راہداری (سی پیک) کو موجودہ صدی کا زبردست گیم چینجر منصوبہ قراردے دیا ،اگر رابطہ سازی،نئی جیو پولیٹکس کی بنیاد ہے تو سی پیک کو موجودہ صدی کا سب سے زبردست منصوبہ قراردیا جا سکتا ہے ۔ بھارتی اخبار ہندوستان ٹائمز نے ہفتہ کو اپنے ایک اداریہ میں بالآخر سی پیک کی اہمیت کو تسلیم کر لیا ، منصوبہ کے بارے میں کہا گیا ہے کہ اس کے خدوخال سے واضح ہے کہ یہ کثیر الجہتی شاہراہوں ، پائپ لائنز اور تجارتی قافلوں سے حوالے سے ہے ،چینی صدر شی چن پھنگ کی جانب سے متعارف کرائے جائے جانے والے ون بیلٹ ون روڈ کے تحت سی پیکانفرانسٹرکچر کا ایک ایسا بین البراعظمی منصوبہ ہے جو کہ موثر طریقے سے پاکستان کو یوریشیا کا لاجسٹکس مرکز بنائے گا جس سے یہ عالمی معیشت کا محور ثابت ہوگا ۔ سی پیک متعدد سطح پر کام کر رہا ہے ،علامتی طور پر یہ ایک ایسی زبردست گواہی ہے جو ثابت کرے گا کہ چین کے ساتھ اتحاد کے معاشی فوائد کیا ہوسکتے ہیں ،عمومی طور پر اس کا موازنہ مارشل فنڈ کے ساتھ کیا جا سکتا ہے جو کہ امریکہ کی جانب سے دوسری جنگ عظیم کے بعد جنگ کی تباہ کاریوں سے متاثرہ یورپ کی بحالی کے لئے مختص کیا گیا تھا ۔ مارشل فنڈ کے ذریعے یورپ کے معاشی ڈھانچے کو بحال کرتے ہوئے اسے سپر پاور بنا دیا گیا ۔ چینی عہدیدار بذات خود یہ کہتے ہیں کہ سی پیک صرف تجارت اور راہداری سے متعلق نہیں ہے بلکہ یہ پاکستان کو مستحکم کرنے کے لئے ہے اور اگر یہ منصوبہ کامیاب ہو گیا تو چین پوری دنیا کے سامنے یہ موقف پیش کرے گا کہ اس نے وہ کردکھایا جو امریکہ نہیں کر سکا ۔ دوسری جانب سی پیک چین کی وہ اہلیت ثابت کرے گا کہ ایک بڑے پیمانے پر بیجنگ حکمت عملی کیساتھ کیسے کام کرتا ہے ۔ واضح رہے کہ گزشتہ ہفتے بھارتی اخبار دی ہندو نے بھی سی پیک کی اہمیت کو تسلیم کرتے ہوئے مودی سرکار کو مشورہ دیا تھا کہ 64ممالک میں رابطہ سازی قائم کرنے والے اس عظیم منصوبے کی مخالفت ختم کی جائے اور فوری طور پر سی پیک کا حصہ بنیں ۔