اسلام آباد (این این آئی) وزیر اعظم محمد نواز شریف نے کہا ہے کہ بجلی منصوبوں کی بروقت تکمیل کیلئے خود نگرانی کر رہا ہوں ٗ کوئی سستی اور غفلت برداشت نہیں کی جائے گی ۔ ماضی کی حکومتوں کا پچھلے پندرہ سال بجلی کی پیداوار پر توجہ نہ دینا افسوسناک ہے ٗ 2018 میں لوڈشیڈنگ کے خاتمے کے بعد بجلی کی پیداوار بڑھانے کا پروگرام جاری رہے گا۔ پیر کو وزیر اعظم نواز شریف کی زیر صدارت توانائی منصوبوں سے متعلق اہم اجلاس ہو ا جس میں وزیر خزانہ اسحاق ڈار ٗ احسن اقبال ٗ خواجہ آصف ٗ وزیر اعلیٰ پنجاب شہباز شریف اور معاون خصوصی طارق فاطمی سمیت اہم حکام نے شرکت کی ۔

اس موقع پر خطاب کرتے ہوئے وزیر اعظم محمدنے کہا کہ معاشی ترقی کیلئے بجلی کی لوڈشیڈنگ سے چھٹکارہ حاصل کرنا ہوگا ۔ بجلی کے شعبے میں ملکی تاریخ میں پہلے کبھی اتنی سرمایہ کاری نہیں ہوئی ٗبجلی کی پیداوار بڑھنے سے معاشی پیداوار اور صنعتی سرگرمیوں میں اضافہ ہوگا ٗوزیر اعظم نے اس عزم کا اظہار کیا کہ حکومت 2022 تک نظام میں 30 ہزار میگا واٹ بجلی شامل کرنا چاہتی ہے ۔

2018 میں لوڈشیڈنگ کے خاتمے کے بعد بجلی کی پیداوار بڑھانے کا پروگرام جاری رہے گا وزیر اعظم نے کہاکہ وہ جاری توانائی منصوبوں پر پیش رفت کا خود جائزہ لے رہیں ہیں، جبکہ توانائی منصوبوں کی بروقت تکمیل یقینی بنائے جائے گی۔