اسلام آباد(مانیٹرنگ ڈیسک) پنجاب اسمبلی میں گرما گرمی ہو گئی،پاکستان مسلم لیگ(ن) سے تعلق رکھنے والے سپیکر پنجاب اسمبلی نے پارلیمانی تاریخ میں پہلی بار ایسی زبان کا استعمال کیا کہ تمام ممبران صوبائی اسمبلی نشستوں پر کھڑے ہو گئے اور تاریخ شرما کر رہ گئی۔ تفصیل کے مطابق پی ٹی آئی کے ایم پی اے اسلم اقبال جب کمیونی کیشن اینڈ وکرس کے صوبائی وزیر چوہدری تنویر سے اپنے حلقے میں پانی کی عدم فراہمی بارے سوال کر رہے تھے تو صوبائی وزیر چوہدری تنویر اسلم اقبال کے سوالات کا جواب نہیں دے سکے۔ جس پر میاں اسلم اقبال نے سپیکر پنجاب اسمبلی سے کہا کہ جناب یہ کوئی ہم پر احسان نہیں کر رہے ، ان سے پوچھا جائے کہ ہمارے حلقے کے لوگوں کو پانی کیوں نہیں فراہم کیا جا رہا؟
میاں اسلم اقبال نے کہا کہ یہ ٹیکسوں کے پیسوں سے وزارت چلا رہے ہیں اور یہ عوام کو جوابدہ ہیں۔نجی ٹی وی رپورٹ کے مطابق میاں اسلم اقبال کی بات کے جواب میں سپیکر پنجاب اسمبلی رانا محمد اقبال خان ایک دم اس طرح غصے میں آ گئے جس کی مثال پاکستان کی پارلیمانی تاریخ میں نہیں ملتی۔ سپیکر پنجاب اسمبلی رانا اقبال خان نے اپنا مائیک بند کیا اور میاں اسلم اقبال سے پرسنل ہوتے ہوئے ایسے الفاظ کہہ دیئے جو میڈیا پر کہے بھی نہیں جا سکتے۔ نجی ٹی وی رپورٹ کے مطابق سپیکر پنجاب اسمبلی نے میاں اسلم اقبال کو کہا کہ ’’بکواس بند کرو، دفعہ ہو جاؤ‘‘ ۔ نجی ٹی وی سماء کی رپورٹ کے مطابق سپیکر پنجاب اسمبلی نے درج بالا الفاظ کے ساتھ ساتھ انتہائی نازیبا الفاظ بھی استعمال کئے۔

موضوعات:پاکستان مسلم لیگ(ن)