اسلام آباد (نیوز ڈیسک)سعودی حکومت نے حج 2025 کے لیے ایک نئی لازمی شرط کا اعلان کیا ہے، جس کے تحت تمام عازمین حج کو میننجائٹس ویکسین لگوانا ضروری ہوگا۔ سعودی وزارت حج و عمرہ کے مطابق، ملکی اور غیرملکی عازمین دونوں کو ویکسینیشن کرانا ہوگی، بصورت دیگر انہیں حج کی اجازت نہیں دی جائے گی۔
حکام کا کہنا ہے کہ ویکسین کے بغیر کسی بھی شخص کو حج پیکج بک کرنے یا رجسٹریشن کرانے کی اجازت نہیں ہوگی۔ یہ اقدام دوران حج متعدی بیماریوں کے پھیلاؤ کو روکنے کے لیے اٹھایا گیا ہے۔ وزارت نے واضح کیا کہ میننجائٹس ایک سنگین بیماری ہے جو رش والی جگہوں پر تیزی سے پھیل سکتی ہے، اور حج جیسے بڑے اجتماع کے دوران اس سے بچاؤ کے لیے ویکسینیشن انتہائی ضروری ہے۔
سعودی حکومت کا یہ اعلان ایسے وقت میں آیا ہے جب حج 2025 کی تیاریوں کا آغاز ہو چکا ہے اور مختلف ممالک کے ساتھ حج معاہدے طے پا رہے ہیں۔ عازمین حج کو ہدایت دی گئی ہے کہ وہ ویکسین وقت سے پہلے لگوالیں تاکہ ان کی رجسٹریشن میں کوئی رکاوٹ نہ آئے۔
