قاہرہ(این این آئی)نیل ڈیلٹا کے علاقے میں 63مقبروں میں مصر کی آخری سلطنت کے قدیم نمونوں کا ایک ذخیرہ دریافت ہوا ہے۔غیرملکی میڈیاکے مطابق مصر کی اتھارٹی برائے نوادرات کے ایک اہلکار نے بتایا کہ نیل ڈیلٹا کے علاقے میں درجنوں مقبروں میں قدیم مصر کی آخری سلطنت کے نمونوں کا ذخیرہ دریافت ہوا ہے۔
وزارت سیاحت اور نوادرات کی ترجمان نیوین المعارف نے کہا کہ ان نمونوں میں سونے کے ٹکڑے اور مصر کے اواخر اور بطلیما کے ادوار کے زیورات شامل ہیں۔انہوں نے کہا کہ کچھ اشیا ملک کے عجائب گھروں میں سے کسی ایک میں نمائش کے لیے رکھی جا سکتی ہیں۔وزارت نے گزشتہ ماہ ماہرین آثار قدیمہ کی جانب سے دمیٹا شہر میں تیل الدیر کے مقبرے میں مٹی کے اینٹوں کے مقبروں کی دریافت کی تصدیق کی تھی۔
