ڈھاکہ (این این آئی)بنگلادیشی آرمی چیف جنرل وقار الزمان نے کہا ہے کہ ملک میں صورتحال بہتر ہورہی ہے، تین چار روز میں حالات معمول پر آجائیں گے۔غیر ملکی میڈیا کے مطابق سرکاری ٹیلی ویژن پر اپنے خطاب میں بنگلادیشی آرمی چیف نے کہا کہ ملک میں صورتحال بہتر ہورہی ہے، پولیس فورس کی بحالی کا کام کر رہے ہیں، فضائیہ اور بحریہ سربراہان کیساتھ مل کر کام جاری ہے، تین چار روز میں حالات معمول پر آجائیں ۔

انہوں نے کہا کہ مسلح افواج کے تمام اہلکار فی الحال پورے ملک میں تعینات ہیں۔انہوں نے کہا کہ عبوری حکومت کے سربراہ محمد یونس سے بات کی ہے جبکہ فوجی رہنماؤں نے طلبہ رہنماؤں، سیاسی جماعتوں اور صدر سے بھی بات چیت کی ہے۔ انہوں نے کہا کہ یقینی ہے محمد یونس کو تمام طبقہ فکر کی حمایت اور مدد حاصل ہوجائے گی۔انہوں نے کہا کہ محمد یونس کی واپسی پر عبوری حکومت جمعرات کی رات تک حلف اٹھا لے گی، کوشش ہے کل رات 8 بجے تک عبوری حکومت کی تقریب حلف برداری ہوجائے، تقریب حلف برداری میں 400 افراد کی شرکت متوقع ہے۔