نئی دہلی(این این آئی)بھارت میں 14سالہ لڑکے نے والدین سے جھوٹی شکایتیں لگانے پر 7 سالہ بہن کا گلا گھونٹ کر اسے قتل کر دیا اور لاش ویرانے میں پھینک دی۔بھارتی میڈیا کے مطابق یہ افسوسناک واقعہ بھارتی ریاست اترپردیش کے بنالی ضلع میں پیش آیا۔ پولیس کے مطابق لڑکا اپنی بہن کی شکایتوں پر اس سے ناراض رہتا تھا کیونکہ اس کی چھوٹی بہن والدین سے شکایتیں لگاتی تھی کہ بھائی اسے مارتا ہے جس کے بعد لڑکے کو والدین سے ڈانٹ سننی پڑتی تھی۔

پولیس کے مطابق ایک روز 14سالہ لڑکے نے اپنی بہن کو سبق سکھانے کا منصوبہ بنایا، لڑکا بہن کو بہانے سے ویرانے میں لے گیا جہاں اس نے بہن کے اسکارف سے ہی اس کا گلا گھونٹ دیا او بعد ازاں لاش وہیں پھینک کر فرار ہوگیا۔گھر آکر بچے نے والد کو فرضی کہانی سنائی کہ بہن بہت بے چین تھی لہذا وہ مدرسے جانے کے بجائے بھاگ گئی، بچی کی گمشدگی کے بعد والدین نے پولیس میں اغوا کی رپورٹ درج کروا دی، بعد ازاں پولیس نے سی سی ٹی وی کیمروں کی مدد سے لاش کے گرد چکر لگانے والے ملزم کی شناخت کر لی۔پولیس کے مطابق لڑکا بہن کو قتل کرنے کے ہر 10منٹ بعد آکر اس کی لاش کو دیکھتا تھا، پولیس نے لڑکے کو پکڑ کر تفتیش کی تو اس نے اعتراف جرم بھی کر لیا۔