اسلام آباد(مانیٹرنگ ڈیسک)بھارت میں سکھوں کی مذہبی ریلی میں دھماکہ، 6 افراد مارے گئے ، متعدد افراد زخمی۔ بھارتی میڈیا کے مطابق بھارتی ریاست پنجاب میں سکھوں کی مذہبی ریلی میں دھماکہ ہوا جس کے نتیجے میں 6 افراد اپنی جان کی بازی ہار گئے۔
جبکہ کئی افرزخمی ہو گئے ہیں۔ ترن تارن کے پلاسور گاؤں کے نزدیک بابا دیپ سنگھ کی جینتی کے موقع پر شوبھا یاترا کی ریلی نکالی جارہی تھی۔تمام ترافراد گوردوارہ ٹاہلا صاحب جارہے تھے کہ راستے میں دھماکا ہوگیا جس کے بعد ریلی میں افراتفری مچ گئی۔ ہندوستانی میڈیا کا کہنا ہے کہ ترن تران میں غیر مسلم برادری مذہبی جوش وعقیدت سے اپنا تہوار منارہی تھی کہ اچانک یہ حادثہ پیش آ گیا۔مقامی پولیس نے بتایا کہ دھماکے میں درجنوں افراد زخمی ہوئے جن میں سے 5 کی حالت تشویش ناک ہے، 2 افراد کے ہلاک ہونے کی اطلاع موصول ہوئی ہے جبکہ ہسپتال ذرائع نے بتایا کہ دھماکے میں مرنے والے افراد کی تعداد 6 ہے۔میڈیا سے بات کرتے ہوئے ترجمان پولیس کا کہنا تھا کہ دھماکا ایک ٹریکٹر ٹرالی میں ہوا جس میں کئی نوجوان سوار تھے اور ہو سکتا ہے کہ اس ٹرالی میں پٹاخے موجود ہوں جن میں چنگاری گرنے سے دھماکا ہو گیا لیکن سکھ یاتریوں کی جانب سے پولیس کا یہ دعویٰ مسترد کر دیا گیا ۔
