تہران(این این آئی)ایران میں حکومت کے وفادار غنڈہ گردوں کی طرف سے سپریم لیڈر آیت اللہ علی خامنہ سے استعفے کا مطالبہ کرنے والے سماجی کارکنوں کی زندگی اجیرن بنا دی گئی ہے۔ایرانی رجیم کے پروردہ یہ ایجنٹ آئے روز ان کارکنوں کے گھروںپر دھاوے بول کر گھروں میںموجود خواتین اور بچوں کو ہراساں کرتے ہیں۔عرب ٹی وی کے مطابق خامنہ ای کو مکتوب ارسال کرنے والے
کارکنوں میں ایرانی رجیم سے منحرف ہونے والے سماجی کارکن محمود نوری زاد بھی شامل ہیں۔ ان کا کہنا تھا کہ 14 کارکنوں نے اپنے دستخطوں سے ایرانی سپریم لیڈر کو مکتوب ارسال کیے۔ ان کا کہناتھاکہ ہم جانتے ہیں خامنہ ای سے استعفے کا مطالبہ خطرات سے پرہے مگرہم اپنی ذمہ داری ادار کرتے ہوئے ایرانی لیڈر کو حالات سے آگاہ کررہے ہیں تاکہ وہ کوئی بروقت فیصلہ کرسکیں۔خیال رہے کہ 10 اور 20 جون کے دوران میں ایران میں سول سوسائٹی اور سیاسی جماعتوں کے 14 کارکنوں نے ایرانی سپریم لیڈر آیت اللہ علی خامنہ ای کو لکھے دو الگ الگ مکتوبات میں استعفیٰ دینے اور دستور میں ترمیم کا مطالبہ کیا تھا۔ یہ دونوںمکتوب ایرانی رجیم کی طاقت ور شخصیت کو ذاتی طورپر ارسال کیے گئے تھے۔جیسے ہی ان مکتوبات کی خبر پھیلی تو ان کارکنوں کے گھروں پر بلوائیوں کے حملے شروع ہوگئے۔ حملے کرنے والے شرپسندوں میں ایرانی رجیم کے پروردہ ایجنٹ شامل ہیں جو خامنہ ای کے استعفے اور ملکی دستور میں تبدیلی کا مطالبہ کرنے والوں کو سبق سکھانے کی کوشش کررہے ہیں۔
