اڑیسا(آن لائن)بھارتی ریاست اڑیسا کے گاؤں میں ایک بندر 15 دن کے بچے کو اٹھا کر لے گیا جس کی لاش گھر کے قریب ایک کنوئیں سے مل گئی۔ریاستی حکام کے مطابق ہفتے کو گاؤں تالاباستا میں ایک بندر خاتون کے پاس سوئے ہوئے 15 دن کے بچے کو چھین کر فرار ہوگیا جس کے بعد پولیس اور 2 ہزار کے لگ بھگ مقامی لوگوں نے بچے کی تلاش شروع کردی۔پولیس کے مطابق بچے کی لاش گھر کے قریب ہی واقع ایک کنوئیں سے مل گئی ہے۔
پولیس افسر پی سی پرادھان کا کہنا ہے کہ’’ بچے کی ہلاکت کا مقدمہ درج کر لیا ہے اور اس کا پوسٹ مارٹم کیا جا رہا ہے تاہم بچے کے بائیں بازو پر خراشیں ہیں جس سے بظاہر معلوم ہوتا ہے کہ وہ بندر کے ہاتھ سے پھسل کر کنوئیں میں گر گیا جس سے اس کی موت واقع ہو ئی۔‘‘واقعے کے خلاف گاؤں کے باسیوں نے محکمہ جنگلات کے دفتر کے باہر احتجاج بھی کیا اور مطالبہ کیا کہ علاقے میں بندروں کی بڑھتی ہوئی آبادی کو روکنے کے لیے بندوبست کیا جائے۔
