اسلام آباد(مانیٹرنگ ڈیسک)افغان صوبہ ہلمند کے شہر لشکر گاہ میں بینک پر کار خودکش حملہ، 29افراد ہلاک جبکہ 50افراد زخمی ہو گئے۔ افغان میڈیا رپورٹس کے مطابق لشکر گاہ میں نیو کابل بینک کی مقامی شاخ کے باہرخوفناک کار خودکش حملے میں 29افراد ہلاک ہو گئے ہیں جن کی ہلاکت کی تصدیق کر دی گئی ہے جبکہ 50سے زائد افراد زخمی ہوئے ہیں۔ ہلاک ہونیوالوں میں زیادہ تعداد افغان سرکاری محکموں کے اداروں ، پولیس اور افغان فوجی اہلکاروں

کی بتائی جا رہی ہے جو عید کی چھٹیاں نزدیک ہونے اور عید بونس کے حصول کیلئے بین سے رقم نکلوانے کیلئے بڑی تعداد میں قطاریں لگائے کھڑے تھے۔ ابھی تک کار خودکش حملے کی ذمہ داری کسی گروپ نے قبول نہیں کی تاہم افغان میڈیا رپورٹس کے مطابق مقامی ذرائع کا کہنا ہے کہ گزشتہ چند ماہ سے ہلمند کے بیشتر علاقوں پر افغان طالبان کااثرورسوخ بڑھ چکا ہے جبکہ اہم دفاعی شہر لشکر گاہ اس وقت بھی افغان حکومت کے ہی کنٹرول میں ہے۔