سرینگر(آئی این پی) مغربی پاکستان کے ہندو مہاجرین کی ریاست جموں و کشمیر میں آباد کاری کیلئے کسی بھی حد تک جانے کا ارادہ ظاہر کرتے ہوئے حکمران جماعت بھارتیہ جنتاپارٹی کے ترجمان نے کہا ہے کہ حریت کانفرنس اور نیشنل کانفرنس کا شور مچانا سمجھ سے بالا تر ہے۔

گزشتہ روزبی جے پی کے ترجمان انیل گپتانے جموں میں صحافیوں سے بات چیت کرتے ہوئے کہا کہ پارٹی کا موقف واضح اور صاف ہے کہ مغربی پاکستانی رفوجیوں کو اْن کا حق ملنا چاہئے حریت یا نیشنل کانفرنس کی جانب سے اس پر شور مچانا بدقسمتی ہے۔ انہوں نے کہا کہ بھارتیہ جنتاپارٹی مہاجرین کی باز آباد کاری کے حوالے سے اپنے موقف پر چٹان کی طرف قائم ہے۔پارٹی مہاجرین کی باز آباد کاری کے حوالے سے اقدامات اٹھا رہی ہے نیشنل کانفرنس یا حریت کانفرنس کی جانب سے اس پر شور مچانے سے بی جے پی اپنی پالیسی تبدیل نہیں کرے گی۔

انہوں نے کہاکہ پاکستانی مہاجرین کوڈومیسائل سرٹیفکیٹ دینا اْن کا حق ہے کیونکہ70 سالوں سے وہ ریاست میں رہائش پذیر ہیں۔ بی جے پی ترجمان نے الزام لگایا کہ نیشنل کانفرنس اور کانگریس اس معاملے پر سیاست کر رہی ہیں لیکن بی جے پی نے فیصلہ کیا ہے کہ رفوجیوں کو اْن کا حق دیا جائے گا اور اس سلسلے میں حریت کانفرنس اور دوسری سیاسی پارٹیوں کی جانب سے شور مچانے سے ہم پیچھے نہیں ہٹیں گے۔