کراچی (نیوز ڈیسک) بھارتی وزیر دا خلہ راج ناتھ سنگھ نے ایک بار پھر دھمکی دیتے ہوئے کہا کہ ہم پر کوئی پہلی گولی چلائے گا توہم جوابی گولیاں شمار نہیں کریں گے ، ’چھیڑیں گے نہ چھوڑیں گے ‘ ، پاکستان رینجرز کے وفد پر واضح کیا کہ کشمیر بھارت کا اٹوٹ انگ تھا ، ہے اور رہے گا۔ بھارتی اخبار ”دی ہندو“ نے خبررساں ادارے کے حوالے سے لکھا کہ راج ناتھ نے کہا کہ اگر بھارت پر کسی نے پہلی گولی چلائی تو بھارت جواب دینے میں پس وپشت سے کام نہیں لے گا۔جنگ رپورٹر رفیق مانگٹ کے مطابق ، بھارت ہمیشہ اپنے ہمسائے ممالک کے ساتھ اچھے دوستانہ تعلقات چاہتا ہے اور کسی کو پریشان نہ کرنے کی اس کی پالیسی جاری ہے لیکن اگر ڈسٹرب کیا گیا تو بھارت حملہ کرنے سے نہیں ہچکچائے گا۔ پاکستان کے ساتھ مسئلہ کشمیر پر راج ناتھ نے کہا کہ انہوں پاک رینجرز اور ان کے وفد کے ساتھ ملاقات میں واضح کیا کہ کشمیر ہمیشہ سے بھارت کا اٹوٹ انگ تھا اور ابھی بھی ہے اور آئندہ بھی رہے گا اور اگر کشمیر پر بات کرنے کی آپ کی خواہش ہے تو صرف پاکستان کے زیر انتظام کشمیر (آزاد کشمیر) پر بات ہوگی، مقبوضہ کشمیر پر نہیں۔ انہوں نے کہا کہ میں نے پاکستانی وفد کواس بات پر قائل کرنے کی کوشش کی ہے کہ تم ہمارے فوجیوں پر گولی چلاتے ہو پھر ہم جوابی کارروائی کرتے ہیں کیوں نہ ہم دونوں دہشت گردی کی لعنت کے خاتمے کیلئے اکھٹے جنگ کریں۔ وزیر داخلہ نے کہا کہ بھارت کو اپنی23ہزار کلومیٹر کی طویل سرحد کی حفاظت کا ایک چیلنج تھا ، جو اب اچھی طرح محفوظ ہے۔ انہوں نے بڑے اعتماد سے دعویٰ کیا کہ بھارت آئندہ دس سے پندرہ برسوں میں دنیا کی سب سے بڑی معیشت بن جائے گا ، بھارت امریکا اور چین کے ساتھ ساتھ ایک بڑی معیشت کے طور پر ابھر کر سامنے آئے گا۔ انہوں نے کہا کہ بھارت بقائے باہمی پر یقین رکھتا ہے اور بھارت دنیا کا واحد ملک ہے جہاں اسلام کے تمام 72فرقے موجود ہیں، یہی بات عیسائیت اور بدھ مت کے لئے لاگو ہوتی ہے۔وہ بھوپال میںقومی سلامتی، چیلنجز اور حکمت عملی کے موضوع پر ایک سیمینار سے خطاب کررہے تھے۔ بھارتی اخبار” ٹائمز آف انڈیا“ وزیر داخلہ کا آئندہ ہفتے پاک اور چین کے ساتھ سرحد پر دورہ طے تھا جسے بی جی پی کے اجلاس کی وجہ سے ملتوی کردیا گیا۔اب یہ دورہ رواں ماہ کے آخر میں متوقع ہے