ممبئی.(نیوزڈیسک)بھارتی شہر ممبئی میں میڈیا ٹائی کون اندرانی مکھرجی کی گرفتاری کے بعد کیس کی تفتیش میں نیا موڑ آگیا۔اندرانی مکھرجی نے جس کا قتل کیا وہ ان کی بہن نہیں بیٹی تھی۔ بھارتی ٹی وی پر ساس بہو کی سازشیں دکھانے والے چینل کے سابق سی ای او کی اپنی زندگی کہانی بن گئی، پیٹر مکھرجی کی بیوی اندرانی مکھرجی کو ممبئی پولیس نے اپنی ہی بہن کے قتل کے الزام میں گرفتار کیا تھامگراب کہانی میں ٹوئسٹ آ گیا ہے،جس نے اندرانی کے شوہرکو ہلا کر رکھ دیا۔ ممبئی پولیس کے مطابق اندرانی نے جس خاتون کا قتل کیاتھا وہ ان کے پہلے شوہر کی بیٹی ہے،جسے اندرانی اپنی بہن ظاہر کرتی تھیں۔ اندرانی پر الزام ہے کہ انہوں نے دوہزار بارہ میں جائیداد کے تنازع پر اپنے ڈرائیور کے ساتھ مل کر شینا بورا کو اغوا اور پھرقتل کی سازش رچی اوراس کی لاش ممبئی سے چوراسی کلو میٹر دور ریگیڈ کے جنگلات میں جلا کر دبادی۔ پولیس نے لاش کے باقیات ملنے کے بعد تحقیقات کا آغاز کیااور ایک شخص کو حراست میں لے لیا،جو اندرانی کا ڈرائیور نکلا،تفتیش کے دوران اس نے پوری کہانی بے نقاب کردی، جس کی بنیاد پرپولیس نے اندرانی کو بھی گرفتار کر لیا۔ ممبئی کی عدالت نے اندرانی اور ان کے ڈرائیورکو اکتیس اگست تک ریمانڈ پر پولیس کے حوالے کردیا ہے۔