اسلام آباد(نیوز ڈیسک ) فلموں اور قصے کہانیوں میں آپ نے خوفناک جنگلوں کا ذکر ضرور سنا ہوگا لیکن رومانیہ میں سینکڑوں ایکڑ پر محیط ایک حقیقی جنگل موجود ہے جسے دنیا کا خوفناک اور ڈرا?نا ترین جنگل قرار دیا جاتا ہے۔آسیب زدہ جنگل کہلانے والا Hoia-Baciu Forest سات سو تیس ایکڑ پر محیط ہے اور دنیا بھر میں مشہور ہے کہ اس میں جانے والے اول تو واپس ہی نہیں آتے اور جو واپس آتے ہیں ان کی حالت دیکھنے والی نہیں ہوتی۔ مقامی لوک داستانوں کے مطابق اس کا نام ایک چرواہے کے نام پر رکھا گیا ہے جو اپنی 200بھیڑوں کے ساتھ جنگل میں گیا اور پھر نہ وہ خود لوٹا اور نہ اس کی بھیڑیں۔ وہ اپنے ریوڑ کے ساتھ پراسرار جنگل میں ہمیشہ کے لئے غائب ہوگیا۔
یہاں پائے جانے والے درختوں کے تنے حیران کن انداز میں خم کھاتے ہوئے اوپر بڑھتے ہیں اور اندھیرے میں عجیب و غریب مخلوقات جیسے نظر آتے ہیں۔ جنگل کے عین درمیان میں ایک گول میدان ہے جس میں لمبے درختوں کی بجائے محض چھوٹی چھوٹی جھاڑیاں ہیں اور اکثر لوگوں کا کہنا ہے کہ اس میدان میں خلائی مخلوقات اترتی ہیں۔ رات کے وقت گھنے درختوں کے نیچے تاریکی میں اچانک روشنی کے ہالے نمودار ہوجاتے ہیں اور ان میں خوفناک درندے دوڑتے بھاگتے اور دھاڑتے نظر آتے ہیں۔مقامی لوگوں کا کہنا ہے کہ انہوں نے جسے بھی اس جنگل کی طرف جاتے دیکھا وہ واپس نہ آیا اور جو چند لوگ کبھی واپس آئے تو ان کے جسموں پر عجیب طرح کے زخم اور نشانات پائے گئے۔ واپس آنے والے جنگل میں نظر آنے والے خوفناک مناظر کا ذکر کرتے ہیں اور لوگوں کو دہشتناک جنگل سے دور رہنے کی تلقین کرتے ہیں۔