لاہور (این این آئی)محکمہ ہیلتھ اینڈ پاپولیشن پنجاب نے جعلی اور مضر صحت ادویات کے حوالے سے الرٹ جاری کر دیا ۔
فیصل آباد میں جاری کیے گئے الرٹ کے مطابق پٹھوں کی طاقت بڑھانے کے لیے استعمال ہونے والی ایک گولی اور سٹیرائڈ کے طور پر استعمال کیے جانے والے ایک انجیکشن کے مخصوص بیچ کو مضر صحت قرار دے دیا گیا ہے۔محکمہ صحت نے ہدایت کی ہے کہ متعلقہ ادویات اور انجیکشن کے مخصوص بیچ کو فوری طور پر مارکیٹ سے واپس اٹھایا جائے تاکہ عوام کو ممکنہ خطرات سے محفوظ رکھا جا سکے۔الرٹ میں مزید کہا گیا ہے کہ سروے یا انسپیکشن کے دوران اگر مذکورہ ادویات یا انجیکشن فروخت یا استعمال کے لیے موجود پائے گئے تو ذمہ دار افراد کے خلاف ڈرگ ایکٹ کے تحت قانونی کارروائی عمل میں لائی جائے گی۔
