کراچی(این این آئی) فلم ’سپر اسٹار‘ میں ماہرہ کے ہمراہ مرکزی کردار ادا کرنے والے اداکار بلال اشرف نے کہا ہے کہ فلم ’’سپر اسٹار‘‘ میں میرا کردار کسی چیلنج سے کم نہیں۔ایک انٹر ویو میں بلال اشرف نے اپنی نئی آنے والی فلم ’سپر اسٹار‘ میں اپنے کردار سے متعلق بات کر تے ہوئے کہا کہ میں فلم میں سمیر کا کردار ادا کر رہا ہوں جوکہ میرے لئے ادا کرنا بہت ہی مشکل تھا جب کہ اسے ادا کرنے کے لئے مجھے کمفرٹ زور سے باہر نکلنا پڑا۔

انہوں نے کہا کہ میرے لئے سب سے اہم بات یہ ہے کہ میں نے اس کردار کو بخوبی نبھانے کے لئے 25 روز تک تھیٹر کی کلاسسز بھی لیں ،یہاں تک کہ میں نے ڈانس کے لئے بھی کئی روز تک محنت کی کیونکہ یہ میرے لئے ایسا کام ہے جو میں نے اس سے قبل کبھی نہیں کیا۔واضح رہے کہ مومنہ درید کی پروڈکشن میں بننے والی فلم ’سپر اسٹار‘ میں ماہرہ خان اور بلال اشرف مرکزی کردار ادا کر رہے ہیں۔ فلم رواں ماہ عید الاضحٰی پر سنیما گھروں میں نمائش کیلئے پیش کی جائیگی ۔