لاہور(این این آئی)سینئر اداکار فردوس جمال نے کہا ہے کہ اگر میں 20سال کی عمر میں ضعیف کا کردار ادا کر سکتا ہوںتو اداکارہ مائرہ خان یا دوسری اداکارائیں کیوں ماں کا کردار ادا نہیں کرسکتیں ، فن میں ہر چیز کی قربانی دینی پڑتی ہے اور بڑا فنکار وہی ہے جو ہر مشکل کردار ادا کر سکے ۔خصوصی گفتگو کرتے ہوئے فردوس جمال نے کہا کہ میری گفتگو کا مقصد مائرہ خان پر تنقید کرنا نہیں بلکہ میں کسی بھی اداکار کی فنی صلاحیتوں کے تناظر
میں بات کر رہا ہوں ۔بھارتی فلم انڈسری میں اداکار سنجے دت کی والدہ اداکارہ نرگس نے بھرپور جوانی میں بڑھاپے کے کردار بھی انتہائی خوبصورتی سے نبھائے جس پر انہیں ایوارڈز سے بھی نوازا گیا ۔ میں نے دیکھا ہے کہ ہمارے ہاں اداکارائیں صرف ہیروئن کی چھاپ لگوانے کے لئے بوڑھی یا ماں کا کردار ادا نہیں کرتیں جو فن کے ساتھ زیادتی ہے ۔انہو ں نے کہا کہ اصل فنکار وہی ہے جو کسی بھی طرح کے مشکل کردار کو اس طرح نبھائے کہ دیکھنے والوں اس کردار کو مدتوں بھلا نہ سکیں ۔
