لاہور(این این آئی) چیئرمین برابری پارٹی پاکستان جواد احمد نے کہا ہے کہ پاکستان بننے کے بعد غریبوں اور محنت کشوں کے حقوق کے لئے سیاسی پارٹیاں تو بنائی گئیں مگران محنت کشوں اور ملکی آبادی کے 99فی صد کے لئے کوئی سیاسی پارٹی نہیں ،ملکی سیاسی پارٹیاں ووٹ تو غریبوں ،محنت کشوں کے نام پر لیتی ہیں مگر تحفظ جاگیرداروں اور مافیاز کو دیتی ہیں،برابری پارٹی کولمبو میں ہونے والی دہشت گردی کی بھر پور مذمت کرتی ہے۔ ان خیالات کااظہارانہوںنے سیمینار سے خطاب کرتے ہوئے کیا انہوںنے کہاکہ پیپلز پارٹی 4دفعہ
مسلم لیگ نواز 3بار جبکہ تحریک انصاف صوبے میں دوسری اور مرکز میں پہلی بار اقتدار میں آئی ہے مگر تینوں جماعتوں نے عوامی مفادات کا احترام کرنے کی بجائے اس ملک کے 99فی صد عوام کی امنگوں اور جذبات کو ٹھیس ہی پہنچایا ہے اور آپسی مفادات کے لئے یہ تمام پارٹیاں اختلافات بھلا کر ایک ہو جاتی ہیں ۔انہوںنے کہاکہ برابری پارٹی پاکستان پہلی ایسی سیاسی پارٹی ہے جو مڈل کلاس،محنت کشوں کو ان کے حقوق دلوائے گی اور ان کیلئے قانون سازی کرنے کے ساتھ ساتھ مختلف مافیاز سے لوٹی ہوئی دولت واپس لے گی۔
