اسلام آباد (نیوز ڈیسک) بالائی سندھ میں تیز آندھی اور مٹی کے طوفان کے خدشے کے پیش نظر متعلقہ اداروں نے الرٹ جاری کر دیا ہے، جبکہ شہریوں کو احتیاطی تدابیر اختیار کرنے کی ہدایت کی گئی ہے۔
تفصیلات کے مطابق محکمہ موسمیات پاکستان اور پراونشل ڈیزاسٹر مینجمنٹ اتھارٹی نے صوبے کے بالائی علاقوں کے لیے گرد آلود ہواؤں اور دھول بھرے طوفان کی پیشگوئی کی ہے۔ڈی جی پی ڈی ایم اے سلمان شاہ کے مطابق مغربی ہواؤں کا نیا سلسلہ آج شام سے ملک کے شمال مغربی علاقوں میں داخل ہو رہا ہے، جس کے اثرات سندھ کے بالائی حصوں تک پہنچنے کا امکان ہے۔حکام کا کہنا ہے کہ 2 اور 3 مئی کے دوران شدید گرد آلود ہوائیں چل سکتی ہیں، جبکہ بعض مقامات پر مٹی کا طوفان بھی آسکتا ہے۔ تیز ہواؤں کے باعث بجلی کے کھمبوں، بڑے سائن بورڈز، سولر پینلز اور دیگر کمزور ڈھانچوں کو نقصان پہنچنے کا خدشہ ظاہر کیا گیا ہے۔محکمہ موسمیات کے مطابق اس موسمی نظام سے میدانی علاقوں میں جاری گرمی کی شدت میں کمی متوقع ہے، جس سے شہریوں کو وقتی ریلیف مل سکتا ہے۔
ڈی جی پی ڈی ایم اے نے کسانوں کو مشورہ دیا ہے کہ وہ موسمی صورتحال کو مدنظر رکھتے ہوئے فصلوں اور کٹائی کے عمل کی حفاظت یقینی بنائیں۔
تمام ضلعی انتظامیہ اور ڈپٹی کمشنرز کو ہدایت کی گئی ہے کہ وہ ہائی الرٹ رہیں اور کسی بھی ممکنہ ہنگامی صورتحال سے نمٹنے کے لیے پیشگی انتظامات مکمل رکھیں۔
حکام کے مطابق مشیر برائے بحالی گیانچند ایسرانی کی ہدایات پر ادارے کا عملہ مکمل طور پر متحرک ہے اور شہریوں کے جان و مال کے تحفظ کے لیے تمام وسائل استعمال کیے جائیں گے۔
