لاہور( این این آئی)ڈیزل کی قیمتوں میں اضافے کے بعد پاکستان گڈز ٹرانسپورٹ الائنس نے ملک بھر میں گڈز کرایوں میں 5 فیصد اضافے کا اعلان کر دیا ۔

صدر الائنس ملک شہزاد اعوان کے مطابق حکومتی پالیسیوں اور بڑھتی لاگت کے باعث یہ قدم اٹھانا ناگزیر ہو گیا ہے۔انہوں نے کہا کہ ڈیزل مہنگا ہونے سے ٹرانسپورٹرز کے اخراجات میں نمایاں اضافہ ہوا ہے، ایک ٹریلر کے ایک چکر کی لاگت میں تقریباً 2 لاکھ روپے بڑھ چکے ہیں۔ ایک ماہ میں ٹرک اور ٹریلر اوسطاً4 ٹرپس کرتے ہیں جس سے مجموعی اخراجات میں 8 لاکھ روپے تک اضافہ ہو رہا ہے۔ملک شہزاد اعوان نے شکایت کی کہ گڈز ٹرانسپورٹرز کو کسی قسم کا موثر ریلیف فراہم نہیں کیا جا رہا جبکہ سبسڈی بھی نہ ہونے کے برابر ہے۔ انہوں نے مطالبہ کیا کہ ٹول ٹیکس، ودہولڈنگ ٹیکس اور موٹروے و ٹریفک پولیس کے چالان ختم کیے جائیں۔

انہوں نے کہا کہ موجودہ پالیسیوں کے باعث ہزاروں ٹرانسپورٹرز اپنی گاڑیاں کھڑی کرنے پر مجبور ہو رہے ہیں۔ انہوں نے خبردار کیا کہ اگر پالیسیوں پر فوری نظر ثانی نہ کی گئی تو ملک میں ٹرانسپورٹ کا نظام شدید متاثر ہو سکتا ہے۔