اسلام آباد (نیوز ڈ یسک)ڈی جی امیگریشن نے شہریوں کو پاسپورٹ دفاتر میں بہتر سہولتیں فراہم کرنے کے لیے جدید ٹیکنالوجی متعارف کرانے کا فیصلہ کیا ہے۔
تفصیلات کے مطابق ڈائریکٹر جنرل امیگریشن اینڈ پاسپورٹ کی سربراہی میں ایک اہم اجلاس منعقد ہوا، جس میں قومی پاسپورٹ نظام کو جدید تقاضوں سے ہم آہنگ کرنے اور ڈیجیٹلائزیشن کے عمل کو تیز کرنے سے متعلق اہم فیصلے کیے گئے۔ترجمان محکمہ پاسپورٹ کے مطابق عوام کو پاسپورٹ دفاتر میں بہتر خدمات دینے کے لیے جدید نظام کو مرحلہ وار شامل کیا جا رہا ہے۔ اس اقدام کا مقصد پاسپورٹ کے حصول کے عمل میں انسانی مداخلت کم کرنا اور اسے زیادہ سے زیادہ ڈیجیٹل بنانا ہے تاکہ شہریوں کو آسانی میسر آ سکے۔اجلاس کے دوران ڈی جی امیگریشن نے پاسپورٹ کے اجرا کے نظام کو مزید تیز، مؤثر اور شفاف بنانے کی ہدایت جاری کی۔
انہوں نے واضح کیا کہ پاسپورٹ کے اجرا میں غیر ضروری تاخیر ہرگز قبول نہیں کی جائے گی اور تمام درخواستوں پر مقررہ مدت میں کارروائی یقینی بنائی جائے۔حکام کے مطابق ان اپ گریڈز سے درخواست دینے کا طریقہ آسان ہوگا اور پاسپورٹ کے حصول میں تاخیر جیسے مسائل کم کرنے میں مدد ملے گی۔
