اسلام آباد (نیوز ڈ یسک) حکومت نے پیٹرولیم مصنوعات کی ایکس ریفائنری قیمتوں میں کمی کے باوجود صارفین کے لیے پیٹرول اور ڈیزل مہنگے کر دیے ہیں،

جس کی بنیادی وجہ ٹیکسز اور دیگر اخراجات میں اضافہ بتایا جا رہا ہے۔دستاویزات کے مطابق ہائی اسپیڈ ڈیزل پر آئی ایف ای مارجن میں 30 روپے 21 پیسے فی لیٹر اضافہ کیا گیا ہے، جبکہ ان لینڈ فریٹ ایکوالائزیشن مارجن بھی بڑھ کر 37 روپے 75 پیسے فی لیٹر ہو گیا ہے۔ اسی طرح پیٹرول پر عائد لیوی میں 26 روپے 77 پیسے فی لیٹر اضافہ کیا گیا۔

دوسری جانب ایک ہفتے کے دوران پیٹرول کی ایکس ریفائنری قیمت میں 3 روپے 14 پیسے فی لیٹر اور ڈیزل کی قیمت میں 3 روپے 44 پیسے فی لیٹر کمی ریکارڈ کی گئی، تاہم اس کمی کا فائدہ عوام تک منتقل نہیں کیا گیا۔یاد رہے کہ حال ہی میں وفاقی حکومت نے پیٹرول اور ڈیزل کی قیمتوں میں 26 روپے 77 پیسے فی لیٹر اضافہ کیا تھا، جس کے بعد پیٹرول کی نئی قیمت 393 روپے 35 پیسے اور ڈیزل کی قیمت 380 روپے 19 پیسے فی لیٹر مقرر کی گئی ہے۔