اسلام آباد (نیوز ڈیسک) لاہور سمیت پنجاب کے مختلف علاقوں میں غیر اعلانیہ لوڈشیڈنگ میں اضافہ دیکھنے میں آ رہا ہے، جس سے شہریوں کو شدید مشکلات کا سامنا ہے۔

ذرائع کے مطابق ملک بھر کی بجلی تقسیم کار کمپنیوں (ڈسکوز) کو بجلی کی فراہمی میں مشکلات درپیش ہیں اور مجموعی طور پر شارٹ فال ساڑھے 3 ہزار میگاواٹ سے تجاوز کر چکا ہے۔رپورٹس میں بتایا گیا ہے کہ لاہور میں لیسکو کے تحت بجلی کی کمی ایک ہزار میگاواٹ سے زیادہ ہو گئی ہے، جس کے باعث شہر اور دیگر علاقوں میں غیر اعلانیہ بندش کا دورانیہ بڑھ گیا ہے۔این ٹی ڈی سی ذرائع کا کہنا ہے کہ آر ایل این جی، ہائیڈرو اور فرنس آئل کی کمی کے باعث بجلی کی پیداوار متاثر ہو رہی ہے، جبکہ باقاعدہ شیڈول جاری نہ کرنے کی وجہ سے عوام کو اچانک لوڈشیڈنگ کا سامنا کرنا پڑ رہا ہے۔

ذرائع کے مطابق جہاں پہلے 2 گھنٹے تک بجلی بند کی جاتی تھی، اب بعض علاقوں میں 6 گھنٹے تک لوڈشیڈنگ ہو رہی ہے، اور امکان ظاہر کیا جا رہا ہے کہ یہ صورتحال آئندہ چند روز تک برقرار رہ سکتی ہے۔