اسلام آباد (نیوزڈیسک)پنجاب حکومت نے بائیکرز کے لیے مجوزہ سبسڈی اسکیم کے تحت فنڈز کے حصول کے لیے محکمہ خزانہ سے 24 ارب روپے کی درخواست کر دی ہے۔

ذرائع کے مطابق اس حوالے سے سمری منظوری کے لیے وزیراعلیٰ پنجاب کو بھجوا دی گئی ہے، جس کی منظوری ملنے کے بعد محکمہ خزانہ متعلقہ رقم جاری کرے گا۔حکومتی اندازوں کے مطابق صوبے میں تقریباً ایک کروڑ 25 لاکھ موٹر سائیکل سواروں کو ماہانہ 2 ہزار روپے تک سبسڈی فراہم کرنے کا منصوبہ بنایا گیا ہے۔محکمہ ایکسائز کے ذرائع کا کہنا ہے کہ اس اسکیم کے تحت بائیکرز کو فی لیٹر پیٹرول پر 100 روپے تک رعایت دی جائے گی۔ اب تک 80 لاکھ سے زائد افراد اس منصوبے کے لیے رجسٹریشن کروا چکے ہیں۔

ذرائع کے مطابق پنجاب میں 1980 سے اب تک تقریباً 5 کروڑ موٹر سائیکلیں رجسٹرڈ ہو چکی ہیں۔ حکام کا کہنا ہے کہ رجسٹریشن کا عمل مکمل ہونے کے بعد ہی سبسڈی کی فراہمی کا باقاعدہ آغاز کیا جائے گا۔