ہانگ کانگ(این این آئی)ایشیائی سٹاک مارکیٹس میں بدھ کو ملا جلا رجحان رہا جبکہ عالمی منڈی میں خام تیل کی قیمتوں میں کمی ریکارڈ کی گئی۔رپورٹ کے مطابق سرمایہ کاروں کی توجہ امریکی سینٹرل بینک پر سیاسی دبا ئوسے ہٹ کر مصنوعی ذہانت کی کمپنی نویدیا کی اہم آمدنی رپورٹ پر مرکوز ہے اور یہ رجحان سٹاک مارکیٹس میں کاروباری سرگرمیوں کے دوران غالب رہا۔

بدھ کی صبح ہانگ کانگ، سڈنی اور تائی پے کی مارکیٹوں میں معمولی اضافہ ہوا، ٹوکیو اور سیئول میں استحکام رہا جبکہ شنگھائی اور بینکاک میں کمی دیکھی گئی۔نیویارک سٹاک مارکیٹ میں تیزی رہی اور کاروباری سرگرمیوں کے اختتام پر ڈا انڈیکس 0.3 فیصد اضافہ سے 45,418.07 پوائنٹس کی سطح پر بند ہوا جبکہ لندن سٹاک مارکیٹ میں ایف ٹی ایس ای 100 انڈیکس 0.6 فیصد کی کمی سے 9,265.80 پوائنٹس پر بند ہوا۔ ادھر، عالمی منڈی میں خام تیل کی قیمتوں میں بھی کمی ریکارڈ کی گئی اور ویسٹ ٹیکساس انٹرمیڈیٹ کے سودے 0.1 فیصد کی کمی کے ساتھ 63.21 ڈالر فی بیرل اور برینٹ نارتھ سی کروڈ کے معاہدے 0.1 فیصد کمی سے 67.18 ڈالر فی بیرل میں طے پائے۔