کراچی (این این آئی)گزشتہ ماہ افراط زر کی شرح میں اعشاریہ دو سات فیصد اضافہ ہوگیا، اکتوبر میں مہنگائی میں اضافے کی شرح توقع سے زائد رہی، تازہ سبزی، پیاز، گیہوں اور دالوں کی قیمتوں میں اضافہ ہوا ہے۔افراط زر کی شرح کو ریورس گیئر لگ گیا، مئی2023 میں 38 فیصد کی بلند سطح پر پہنچنے کے بعد بتدریج نیچے آتے آتے اکتوبر میں پھر بڑھ گئی۔
گزشتہ ماہ افراط زر کی شرح سات اعشاریہ ایک سات فیصد ہوگئی جو ستمبر میں چھ اعشاریہ نو فیصد تھی وزارت خزانہ نے گزشتہ ماہ کے لئے افراط زر کا اندازہ چھ سے سات فیصد لگایا تھا۔ادارہ شماریات پاکستان کے مطابق اکتوبر 2024 میں تازہ سبزی، پیاز، گندم، دالیں، پانی کی فراہمی، الیکٹرک چارجزاور ہاس ہولڈ ٹیکسٹائل کی قیمتوں میں اضافہ ہوا۔اعداد و شمار کے مطابق جولائی سے اکتوبر 2024 تک افراط زر آٹھ اعشاریہ چھ سات فیصد رہا جو گزشتہ مالی سال چار ماہ میں اٹھائیس اعشاریہ چار پانچ فیصد تھا۔
