لاہور( این این آئی)صوبائی دارلحکومت میں 20کلو آٹے کے تھیلے کی قیمت میں 50روپے اضافہ کر دیاگیا ،ایک ہفتے کے دوران ایک کلو چینی کی قیمت 18روپے بڑھ گئی ہے ۔آٹا ڈیلرز ایسوسی ایشن کے صدر حاجی یوسف کے مطابق 20 کلو آٹے کے تھیلے کی قیمت 50روپے اضافے سے 2900روپے تک پہنچ گئی ہے۔ انہوں نے کہا کہ فلور ملیں اوپن مارکیٹ سے مہنگی گندم خرید رہی ہیں جس کی وجہ سے آٹے کی قیمت بڑھ رہی ہے۔شوگر ڈیلرز کے مطابق ایک ہفتے میں ایک کلو چینی کی ایکس مل قیمت میں 18 روپے اضافہ سے 138روپے تک پہنچ گئی ہے جبکہ پرچون سطح پر ایک کلو چینی کی قیمت 140روپے سے بڑھ کر 150روپے ہو گئی ہے۔