کراچی (این این آئی) فیڈرل بورڈ آف ریونیو (ایف بی آر)نے کہا ہے کہ گزشتہ 3 روز سے ملک بھر میں جاری احتجاج، انٹرنیٹ کی بندش اور کاروبار زندگی معطل ہونے سے معیشت کو اربوں روپے کا نقصان پہنچ گیا۔
تفصیلات کے مطابق فیڈرل بورڈ آف ریونیو(ایف بی آر)کا کہنا ہے کہ گزشتہ 3 روز سے ملک بھر میں جاری احتجاج کے باعث معیشت کو اربوں روپے کا نقصان پہنچ گیا۔ایف بی آر کا کہنا ہے کہ ٹیلی کام سیکٹر کو پونے 2 ارب کے قریب نقصان کا ابتدائی تخمینہ لگایا گیا ہے، ٹیلی فون، انٹرنیٹ اور سوشل میڈیا کی بندش سے تقریبا 60 کروڑ روپے ٹیکس ریونیو کا نقصان ہوا۔ایف بی آر کے مطابق آئی ٹی اور فری لانس انڈسٹری کو یومیہ 20 لاکھ ڈالر نقصان کا سامنا ہے۔احتجاج سے ملک بھر میں لاکھوں کا دیہاڑی دار مزدور طبقہ روزگار سے محروم ہوا، ٹرانسپورٹ بند ہونے سے ٹرانسپورٹرز کا کاروبار بھی متاثر ہوا۔راستے بند ہونے سے مارکیٹوں اور دکانداروں کو بھی کروڑوں روپے کے نقصان کا سامنا ہے۔
