لاہور (آن لائن) محکمہ سیاحت پنجاب کی جانب سے ڈبل ڈیکر بس کے شیڈول میں نئے روٹ کا اضافہ کر دیا گیا ہے، نئے روٹ کا باقاعدہ افتتاح 25 ستمبر بروز جمعہ کو کیا جائے گا۔ افتتاحی تقریب کا اہتمام ڈبل ڈیکر بس ہیڈ کوارٹر فٹ بال سٹیڈیم میں کیا جائے گا، تقریب میںاہم شخصیات کو مدعو کیا گیا ہے۔ ڈبل ڈیکر بس شیڈول میں نئے روٹ شامل ہونے سے شہری دائی انگاہ، بدھو آوا اور شالامار باغ کی سیر سے لطف اندوز ہو سکیں گے، شاندار تقریب کے انعقاد کے لئے منیجر پنجاب اشفاق احمد ڈوگر کی طرف سے

اپنی ٹیم کے ہمراہ تیاریوں کو حتمی شکل دینے کا عمل تکمیل کے مراحل میں ہے اور جمعرات 24 ستمبر تک تمام تر تیاریاں مکمل کر لی جائیں گی۔ اس سلسلہ میں منیجر ڈبل ڈیکر بس پنجاب اشفاق احمد ڈوگر نے کہا ہے کہ کہ ڈبل ڈیکر بس شیڈول میں شالامار باغ کی شمولیت کے باعث محکمہ سیاحت پنجاب سیاحتی مشن میں ایک اور سنگ میل عبور کرنے جا رہا ہے۔ لاہور کی ثقافت کو اجاگر کرنے میں محکمہ سیاحت کی کاوشیں رنگ لا رہی ہیں۔ انہوں نے کہا کہ موجودہ حکومت کی سیاحت کے فروغ کی پالیسی میں ٹی ڈی سی پی کا کردار اہم ہے، محکمہ سیاحت پنجاب کے عملی اقدامات وزیراعظم عمران خان کے ویژن سیاحت کے فروغ کے عکاس ہیں۔