لاہور( این این آئی)ریلوے انتظامیہ نے کورونا وائرس کے پھیلائو کو روکنے کیلئے ٹرین آپریشن معطل یا محدود کرنے کے آپشنزپر غور شروع کر دیا ۔ ذرائع کے مطابق کورونا وائرس کے پھیلائو کے پیش نظر ٹرین آپریشن معطل یا مختلف سیکشنوں تک محدود کرنے پر غور شروع کردیا گیا ہے ۔کورونا وائرس کے سبب ملک بھر میں ریل سے
سفر کرنے والے افراد نے ٹکٹیں بھی ری فنڈ کروانا شروع کر دی ہیں اور چند روز میں لاکھوں روپے کی رقم ری فنڈ کی گئی۔آئندہ چند روز کیلئے لاہور سے کراچی،ملتان، کوئٹہ،پشاور اور راولپنڈی سمیت دیگر شہروں کی ریزرویشن نہیں کروائی جارہی جس کی وجہ سے ٹرینیں خالی جائیںگی۔ذرائع کے مطابق ٹرینیں خالی آنے جانے سے محکمہ ریلوے کو ڈیزل اور آپریشن کی مد میں مالی خسارے کا اندیشہ ہے جسے دیکھتے ہوئے مختلف آپشنز پر غور شروع کر دیا گیا ۔
