اسلا م آباد/لاہور( این این آئی)پاکستان کارپٹ مینو فیکچررز اینڈ ایکسپورٹرز ایسوسی ایشن کاوفد بین الاقوامی نمائش ’’ ڈومو ٹیکس ‘‘ میں شرکت کیلئے جرمنی روانہ ہو گیا ،نمائش میں پاکستانی مصنوعات کے سٹالز لگانے کے علاوہ دو طرفہ تجارت کے فروغ اور دوسرے ممالک کے
تجربات سے بھرپور استفادہ کرنے کیلئے وفود کی سطح پر ملاقاتیں بھی کیا جائیں گی ۔ایسوسی ایشن کے سینئر مرکزی رہنما عبد اللطیف ملک نے وفد کے ہمراہ روانگی سے قبل گفتگو کرتے ہوئے کہا کہ بھرپور تیاری کے ساتھ نمائش میں شرکت کر رہے ہیں اور اس دورے میں سو فیصد نتائج حاصل کرنے کیلئے پیشگی منصوبہ بندی بھی کی ہے ۔انہوں نے کہا کہ ہمارا مقصد نئی منڈیوں کی تلاش ہے اور اس کیلئے دنیا بھر سے آئے ہوئے خریداروں سے وفود کی سطح پر ملاقاتیں اور انہیں دو طرفہ تجارت کے فروغ اور ایک دوسرے کے تجربات سے استفادہ کرنے کیلئے پاکستان آنے کی دعوت بھی دی جائے گی ۔انہوں نے کہا کہ ’’ ڈومو ٹیکس ‘‘نمائش میں پاکستانی سٹالز کیلئے انتہائی دیدہ زیب ڈیزائن کی حامل کارپٹ مصنوعات کا چناؤ کیا گیا ہے جنہیں یقینی طو رپر پذیرائی ملے گی ۔نمائش میں بڑے پیمانے پر غیر ملکی سودے ہونے کا امکان ہے جس سے ہماری انڈسٹری کو تقویت ملے گی اور روزگار کے نئے مواقع پیدا ہوں گے۔ انہوں نے کہا کہ بیرون ممالک پاکستانی کارپٹ مصنوعات کی بڑی مانگ ہے لہٰذا حکومت سے مطالبہ ہے کہ انڈسٹری کی سرپرستی کرے جس کے ہماری معیشت پر انتہائی مثبت اثرات مرتب ہوں گے۔ عبد اللطیف ملک نے کہا کہ موجودہ حالات میں ہمیں اپنی مصنوعات کیلئے نئی منڈیا ں تلاش کرنے کی ضرورت ہے جس کیلئے حکومت تمام بین الاقوامی نمائشوں میں شرکت کو یقینی بنانے کی پالیسی بنائے ۔
