لاہور( این این آئی) پاکستان کارپٹ مینو فیکچررز اینڈ ایکسپورٹرز ایسوسی ایشن نے برآمدات میں اضافے کیلئے ایمر جنسی کی طرز پر اقدامات کا مطالبہ کرتے ہوئے کہا ہے کہ اس کے بغیر ملکی معیشت اپنے پاؤں پر کھڑی نہیں ہو سکتی ، ترکی ، تھائی لینڈ، ملائیشیاء سمیت
دیگر ممالک سے بھی تجارت میں توازن کیلئے فری ٹریڈ ایگریمنٹس کرنے کیلئے عملی پیشرفت کرنے کی ضرورت ہے ۔ ان خیالات کا اظہار ایسوسی ایشن کے گروپ لیڈر عبد اللطیف ملک نے کارپٹ انڈسٹری کو درپیش مسائل کے حوالے سے بلائے گئے ہنگامی اجلاس میں کیا ۔ اس موقع پر کارپٹ انسٹی ٹیوٹ کے چیئرمین سعید خان، ایسوسی ایشن کے سینئر وائس چیئرمین اعجاز الرحمان، سینئر ممبر ریاض احمد، لطیف ملک ، میجر (ر) اختر نذیر اور اکبر ملک سمیت دیگر بھی موجود تھے ۔ اجلاس میں انڈسٹری کو درپیش دیرینہ مسائل کے حوالے سے تفصیلی تبادلہ خیال کیا گیا اور ہیجانی کیفیت پر تشویش کا اظہار کیا گیا ۔ عبد اللطیف ملک نے کہا کہ وزیر اعظم عمران خان کی جانب سے لاہور چیمبرز کے عہدیداروں سے ملاقات میں برآمدات کے فروغ کیلئے برآمد کنندگان کی معاونت کا عندیہ خوش آئند ہے لیکن اس پر فوری سے پہلے عملدرآمد کی ضرورت ہے ۔ تجارتی پالیسی کو وضع کر کے اس کا اعلان کیا جائے ۔ ایف ٹی اے کیلئے صرف چین پر توجہ مرکوز کرنے کی بجائے ترکی ، تھائی لینڈ، ملائشیاء اور ان ممالک سے بھی رابطے کئے جائیں جہاں پر ہماری مصنوعات کیلئے مواقع موجود ہیں ۔ ٹریڈ ڈویلپمنٹ اتھارٹی انٹر نیشنل مارکیٹنگ کیلئے اقدامات میں تیزی لائے اور وفود کو بیرون ممالک بھجوانے اور سنگل کنٹری نمائشوں کے انعقاد کیلئے پالیسی مرتب کی جائے۔
