لاہور( این این آئی)پاکستان کارپٹ مینو فیکچر رزاینڈ ایکسپورٹرز ایسوسی ایشن کے زیر اہتمام 17اکتوبر سے لاہور میں شروع ہونے والی تین روزہ عالمی نمائش کی تیاریاں حتمی مراحل میں داخل ہوگئیں ،نمائش کے افتتاح کے لئے وزیراعظم کے مشیر برائے صنعت و تجارت عبدالرزاق داؤد کو مدعو کیا گیا ہے ۔
نمائش میں شرکت کرنے والے غیر ملکی خریداروں اور مندوبین کے سا تھ مستقبل میں مضبوط روابط کے فروغ اور وفود کی سطح پر تبادلوں کیلئے بھی بات چیت کی جائے گی ۔ نمائش کی تیاریوں کے حوالے سے ایسوسی ایشن کے رہنماؤں کاجائزہ اجلاس گزشتہ روزمنعقد ہوا جس میں سابق چیئرمین عبد الطیف ملک ،نارتھ سرکل کے وائس چیئرمین اعجاز الرحمان، کوارڈی نیٹر ٹڈیپ ریاض احمد ،کارپٹ انسٹی ٹیوٹ کے چیئرمین سعید خان ، مشتا ق احمد بٹ ،کامران رضی ،خواجہ خالد رشید ،عمر حنیف سمیت دیگر نے شرکت کی ۔ اجلاس کے شرکاء نے نمائش کی تیاریوں پراطمینان کا اظہار کرتے ہوئے کہا کہ کارپٹ انڈسٹری کو دوبارہ عروج پر لے جانے کیلئے کوئی کسر اٹھا نہیں رکھی جائے گی ۔ حکومت اور خصوصاًٹریڈ ڈویلپمنٹ اتھارٹی پاکستان کی جانب سے بھرپور تعاون حاصل ہے اور اسے مثبت طریقے سے بروئے کار لاتے ہوئے بین الاقوامی نمائشوں میں زیادہ سے زیادہ شرکت کو یقینی بنایا جائے گا ۔ اجلاس میں کہا گیا کہ پاکستانی مصنوعات کیلئے مزیدغیر ملکی منڈیوں کی تلاش ناگزیرہے اس لئے نمائش میں شرکت کیلئے آنے والے غیر ملکی خریداروں اور مندوبین سے مستقبل میں مضبوط روابط کوفروغ دینے کیلئے موثر نظام بنایا جائے گاجس سے وفود کی سطح پر تبادلوں میں بھی آسانی میسر آئے گی ۔
