اسلام آباد(آئی این پی)وزیراعظم نوازشریف نے کہا ہے کہ نیواسلام آباد ایئرپورٹ میں عوام کوبہترین سہولیات فراہم کرنے کیلئے تمام اقدامات کیے جائیں، ایئر پورٹ پر سہولیات کیلئے کام کے معیار پر کوئی سمجھوتہ نہیں کیا جائے گا،رابطہ سڑکیں اور میٹرو بس لنک پاکستان آنے والے غیر ملکیوں کیلئے دیکھنے میں پاکستان کی ترقی کا نشان ہونگے۔ پیرکو وزیراعظم نوازشریف کی زیر صدارت اعلی سطحی اجلاس ہوا جس میں نیواسلام آباد ایئرپورٹ منصوبے اورملحقہ انفرااسٹرکچرکاجائزہ لیاگیا۔
نوازشریف نے کہاکہ انفراسٹریکچر منصوبے ترقی کرتی ہوئی معیشت کیلئے ریڑھ کی ہڈی کی حیثیت رکھتے ہیں اور عوام کو سہولت فراہم کرنے کیلئے ضروری ہیں۔سیکرٹری ایوی ایشن نے بریفنگ دیتے ہوئے آگاہ کیا کہ ائیرپورٹ ٹرمینل بلڈنگ کا 95فیصد کام مکمل ہوچکا ہے اور مارچ 2017 کے دوران تمام تعمیراتی کام مکمل کرلیا جائے گا۔تمام آزمائشی تجربات کے بعدجولائی2017 میں فضائی آپریشن شروع کیاجاسکے گا۔وزیراعظم کو آگاہ کیا گیا کہ نیواسلام آبادایئرپورٹ پربیک وقت4500مسافروں کوسہولیات فراہم کی جاسکیں گی اور بیک وقت 15 اسٹیشنوں میں 2اے 380ایئر کرافٹ بیک وقت ڈوک کرسکیں گئے ۔بریفنگ میں بتایا گیا کہ نیو ائیرپورٹ جدید ترین سہولیات سے آراستہ ہوگا جس میں کارگو ہینڈلنگ ،سیفٹی اور سیکورٹی ،مسافروں کی سہولیات اور پارکنگ شامل ہوگی ۔،چیئرمین این ایچ اے نے بتایا کہ ایئرپورٹ کوموٹروے ایم ون،ایم ٹواورجی ٹی روڈسے منسلک کیاجارہاہے۔اسلام آبادایئر پورٹ کومیٹروبس سروس سے بھی منسلک کیا جائے گاجس کا وزیراعظم نوازشریف14اگست کونیواسلام آباد ایئر پورٹ کے ساتھ افتتاح کریں گے۔وزیراعظم نے ہدایت کی کہ ایئر پورٹ پر سہولیات کیلئے کام کے معیار پر کوئی سمجھوتہ نہیں کیا جائے گا۔رابطہ سڑکیں اور میٹرو بس لنک پاکستان آنے والے غیر ملکیوں کی نظر میں پاکستان کی ترقی کا نشان ہونگے ۔
وزیراعظم کو بتایا گیا کہ علامہ اقبال انٹرنیشنل ایئرپورٹ کے نئے ٹرمینل کاکام مارچ میں شروع ہوگا۔اجلاس میں سیکرٹری ایوی ایشن ڈویژن ،چیئرمین این ایچ اے ،وزیراعظم کے سیکرٹری اور دیگر اعلی حکام نے شرکت کی ۔اجلاس میں وزیراعظم نے گولڑہ موڑ سے ایئرپورٹ تک میٹروبس کے روٹ اور میٹرو لنک کے ڈیزائن کی بھی منظوری دی ۔
